Ziyanda izinkinga kusaziwayo

Sizwe Sibiya

Ziyaqonga izinkinga kuDJ Fresh, njengoba kuvulwe kabusha icala lokunukubeza ngokocansi elibhekene naye noDJ Euphonik, kungakapholi maseko umkakhe uThabiso Sikwane efaka isehlukaniso kulandela iminyaka engu-20 beshadile.

Osolwa ngokuba yisisulu salabo DJ ababili – odume ngelika Nampree ku-Twitter – ukuqinisekisile ukuthi icala lizophinde livulwe kabusha ngemuva kodaba olumayelana naleli cala olusabalale ezinkundleni zokuxhumana ngeSonto.

“Icala SELIPHINDE LAVULWA! Ngiyabonga ngokungeseka kwenu,” kubhala uNampree.

“Angikholwa ukuthi sekuphele unyaka kuliwa ngaleli cala,” ebhala komunye umbhalo ku-Twitter.

Icala lokuqala lachithwa ngasekuqaleni konyaka odlule i-National Prosecuting Authority ngenxa “yokuntuleka kobufakazi”. Labo DJ ababili babe sebevula icala le-crimin injuria ngo-Mbasa ngo-2021 elibhekene nesisulu sokudlwengulwa ngokululaza isithunzi sabo. Icala liphinde lachithwa i-NPA ngoMandulo nyakanye.

UDJ Fresh, ogama lakhe langempela nguThato Sikwane, no-Euphonik, ogama lakhe langempela nguThemba Nkosi, baxoshwa emsakazweni ababesebenza kuwo i-947, ngoMasingana nyakanye ngemuva kokuvela kwezinsolo zokudlwengula ezaqala ngo-2011.

Phakathi kwazo zonke lezi zinxushunxushu, laba ababili basalungiselela uhambo lwaminyaka yonke lomkhumbi i-“Oh Ship” oluzoqala ngoNdasa. Khonamanjalo u-Euphonik umatasa uvakashela e-Asia naseYurophu.

“SEKUSELE AMASONTO angu-3 kuphela ukuthi siye e-Oooooooooh Ship! Asizilungiseleleni!!” funda okubhalwe kwi-akhawunti yaku-Twitter ye-Oh Ship, eyabiwe yilaba baculi ababili.

Izihloko zakamuva