Umshayisibhakela wakuleli nethemba lokuwina ekhaya 

Lubhalwe nguLinda Ximba

Ikhempu yompetha wesibhakela wakuleli uSivenathi “Special One” Nontshinga izimisele ngokufeza isifiso sayo nokumbona evikela ibhande lakhe ekhaya.

Kodwa ukusingatha impi esezingeni le-International Boxing Federation (IBF) noma i-World Boxing Council (WBC) kudinga uxhaso olukhulu lwezimali oluvela ezinkampanini ezizimele nohulumeni wasekhaya.

I-Rumble Africa Promotions ithe ithandazela ukuthi kufezwe isicelo sabo sempi phakathi kukaNontshinga noRegie Suganob wase-Philippines ezoba esifundazweni salo mpetha e-Eastern Cape.

UNontshinga (24) wenza elakuleli laziqhenya ngesikhathi elwa ngendlela encomekayo ebhekene noHector Flores e-Mexico ngoMandulo odlule waphinde waletha isicoco se-IBF ekhaya.

“Sibhalele izinhlaka ezahlukene zikahulumeni futhi zivumile ukuthi ziwatholile ama-imeyili ethu ngakho silinde ngesineke,” kusho isikhulu se-Rumble Africa uNomfesane Nyatela.

“Inhloso yethu ukusingatha impi ngoMbasa e-Eastern Cape futhi sisebenza kanzima ukuthi iphumelele. Kusobala ukuthi sibheke ukuthola abaxhasi,”

Ukusingatha impi ekhaya kunikeza umshayisibhakela inzuzo enkulu, kanti isivakashi sivame ukudinga ukugwema amajaji ngokushaya i-knock-out uma enethemba lokuwina.

UNontshinga akakahlulwa emsebenzini wakhe wesibhakela. Kuze kube manje usewine izimpi zakhe ezingu-11, kanti eziyisishiyagalolunye zalezo waziwina nge-knockout.

Ubekwe endaweni yesithupha kwabahamba phambili kunabo bonke emhlabeni kowe-flyweight i-BoxRec kanti ungowesikhombisa kwi-IBF.

Esithombeni esingenhla: USivenathi Nontshinga

Umthombo wesithombe: Twitter

Izihloko zakamuva