Lubhalwe nguDylan Bettencourt
URelebohile Mofokeng ushayele i-Orlando Pirates i-hat-trick kanti umqeqeshi uHugo Broos uhlela ukumsebenzisa njengomdlali odlala phakathi kweBafana.
UJayden Adams uphuthelwe isikwati seBafana ku-Africa Cup of Nations ngo-2025 ngenxa yezinkinga zokungaziphathi kahle kodwa uBroos uthi usefundile.
Umqeqeshi weBafana Bafana, uHugo Broos, uthi ujabule ngokubuyela efomini kukaRelebohile Mofokeng noJayden Adams ngaphambi kweNdebe yoMhlaba ye-Fifa ka-2026.
UMofokeng ushaye into ecokeme ngesikhathi i-Orlando Pirates ihlula iTS Galaxy ngo 6-0 eMbombela ngempelasonto. IPirates isembangweni wesicoco seBetway Premiership neMamelodi Sundowns.
UBroos uthe ukwehla kukaMofokeng efomini ekuqaleni kwale sizini akumangazi kumdlali osemncane obhekwe ngabomvu.
“Bekunokuningi ekhanda lakhe waze wakhohlwa ukudlala ibhola. Lokhu kujwayelekile futhi angimsoli,” kusho uBroos.
UBroos uhlela ukusebenzisa uMofokeng njengomdlali ophakathi kuBafana, hhayi njengomdlali wasemuva.
“Izimfanelo zakhe wubuhlakani nokusebenzisa izikhala, kulapho ehamba phambili khona,” kusho uBroos.
UBroos ushiye u-Adams eqenjini leBafana ebelidlala ku-Africa Cup of Nations (Afcon) eMorocco ngo-2025 ngemuva kwezinkinga zokungaziphathi kahle. NgoMfumfu ka-2024, u-Adams waxoshwa ekhempini yeBafana.
Kodwa uBroos uthe lo mdlali weMamelodi Sundowns usekhulile.
“Ngesikhathi eya kuSundowns, ubecabanga ukuthi konke sekwenzekile kwathi ngesinye isikhathi walahlekelwa. Wayengadlali, ehlezi ebhentshini ngisho nasezinkundleni,” kusho uBroos.
“Uvuthwe kakhulu ngonyaka odlule ngoba ubezibuka esibukweni,” kusho uBroos.
IBafana izobhekana nePanama eMoses Mabhida Stadium eThekwini ngoLwesihlanu naseCape Town Stadium ngoLwesibili. Le midlalo emibili iyimidlalo yabo yokugcina yokuzilungiselela ngaphambi kokuthi baye eNorth America ngoNhlaba kwiNdebe Yomhlaba ka-2026 ngoNhlangulana nangoNtulikazi.
Esithombeni esingenhla: Umqeqeshi weBafana Bafana uHugo Broos.
Umthombo wesithombe: Ifayela