Lubhalwe nguCelani Sikhakhane
UMasipala Wesifunda iLembe uchitha u-R250,000 ngosuku ukukhokhela amathangi amanzi kanti imindeni yase-Gledhow, Larkfield naseMbozamo ihlale ivalelwa amanzi.
Ukulungiswa kabusha kuka-R31 million kuzovala indawo yamapayipi amadala angaphezu kwamakhilomitha angu-15 ezigcemeni ezintathu futhi kudaleke amathuba emisebenzi angu-45 kubasebenzi bendawo.
Imindeni yonkana kumasipala iLembe ithi impilo yayo isiphenduke impi yansuku zonke yokufuna amanzi njengoba amapayipi amadala elokhu eqhuma nompompi bomile.
Uma lokhu kwenzeka, umasipala uphendukela emathangeni amanzi, futhi izindleko zinkulu. Usebenzisa u-R250,000 ngosuku ukuze abantu bathole amanzi.
Izakhamizi ezinjengoZanele Ngcobo zithi kuphela izinsuku zingawatholi amanzi. Uthe: “Sithemba ukuthi lokhu ekugcineni kuzosilethela injabulo.”
Kulelisonto umasipala uqale uhlelo olukhulu lokulungisa. Kwethulwe uhlelo luka-R31 million lokushintsha amapayipi amadala e-asbestos alokhu eqhuma. Umsebenzi usuqalile eGledhow, eLarkfield naseMbozamo, uhlanganisa uWadi 15 no-18.
IMeya uThobani Shandu ithe uhlelo ukushintsha amapayipi angaphezu kwamakhilomitha angu-15 kufakwe aqinile e-PVC ne-HDPE. E-Gledhow naseLarkfield kuzoshintshwa amapayipi angamakhilomitha angu-11.2. Uthe: “Lokhu kuthuthukiswa kuzonciphisa ukuphazamiseka kwamanzi, ukuvuza nokuqhuma.”
Inkontileka izoletha ukukhululeka okuthile nakubasebenzi bendawo. Izodala amathuba omsebenzi angu-45, angu-15 eGledhow nangu-20 eLarkfield, kanti okungenani u-15% womsebenzi, obiza ngaphezu kwezigidi ezingu-R6.2, uzoya ezinkampanini ezincane zakulendawo.
UShandu uthe: “Siletha ingqalasizinda esimeme engagcini ngokulungisa amanzi kodwa ehlinzeka namathuba omnotho kubantu bakithi.”
Iphrojekthi iyaqhubeka futhi kulindeleke ukuthi iphele ngomhlaka-28 kuNhlolanja ka-2027.
Ingxenye yokugcina yomsebenzi, yokuthuthukisa iMbozamo, izokwethulwa ngesonto elizayo.
Ikhansela lewadi uMnuz Khehla Ndlovu uthe izakhamuzi sezikulinde isikhathi eside lokhu. Uthe amapayipi amadala adala ukuphazamiseka njalo.
Esithombeni esingenhla: Isifunda iLembe silahlekelwe yizigidi ngenxa yokonakala kwezinhlelo zamanzi kanye nezindleko zamathangi ezimo eziphuthumayo
Umthombo wesithombe: Sithunyelwe