Lubhalwe nguCelani Sikhakhane
Umholi we-EFF uMnuz Julius Malema uthi ubengazi ukuthi imvunulo yamabutho kaZulu ibiza njengezimpahla zeLouis Vuitton.
UMalema ukusho lokhu ekhuluma emgcagcweni weNgonyama uMisuzulu kaZwelithini ngeSonto obusesigodlweni kwaKhangela Amankengane, kwaNongoma.
Uthi ubehlale eyibona imvunulo kaZulu ezinkundleni zokuxhumana njengoba kukekwakhulunywa ngayo kakhulu kodwa ubengazi ukuthi ibiza kangaka.
“Ngesikhathi ngiseThekwini ngacela uNobhala Jikelele wethu ukuba angisize ngithole imvunulo yangempela ngoba lokhu ebengikufakile bekungumbombayi. Kuthe uma sesithenga, imbatha lavele langibiza imali engu-R5000!. Ngibone lapho ukuthi kanti imvunulo yamaZulu ibiza njengezimpahla zeLouis Vuitton. Okusho ukuthi iLouis Vuitton yase-Africa. Kodwake lokhu kungikhombisile ukuthi amaZulu awazibukeli phansi futhi ayaziqhenya ngayikho , yingakho nemvunulo yawo ibiza kangaka,” usho kanje.
IMvunulo yakwaZulu isuse umsindo ngenyanga eyedlule lapho izinsizwa zakwaNhlapho bezishada zodwa zivunule ngayo zahloba zaqeda.
Lokhu kucasule uNgizwe Mchunu obevutha engabaselwe ethi badelela uZulu wonkana futhi babukela phansi isiko namakhosi esizwe samaZulu.
Lolu daba lugcine lungenelelwa iKhomishana yamaLungelo nayo esigcine udaba ilufaka enkantolo ngoba uNgizwe engafuni ukuxolisa.
Ngaphandle kwalokho iScrolla.africa sithole ukuthi imvunulo iphelele yebutho ibiza kusuka ku-R55 000 kodwa kuncika nasekutheni uyithenge kuphi.