Lubhalwe nguPalesa Matlala
- Owesilisa obehlomile ephethe isibhamu esikhulu nesincane ungene endaweni egadiwe ngaphambi kokuba amaphoyisa amdubule embophele ehhotela.
- Isikhulu se-United States Secret Service sidutshulwe eduze kodwa sasinda, kuyilapho uMengameli uDonald Trump ekhishwa ngokushesha emcimbini obugcwele abantu.
Abasebenzi base-United States Secret Service baphuthumise uMengameli uDonald Trump ngaphandle esiteji ngemuva kokuqhuma kwesibhamu esidlweni esikhulu sabezindaba eWashington.
Lokhu kwenzeke ngoMgqibelo ebusuku esidlweni sakusihlwa seWhite House Correspondents’ Association esisehhotela iWashington Hilton.
Indoda ebihlomile ingene ngenkani endaweni yonogada. Ibiphethe isibhamu esikhulu nesincane.
Onogada bavulele ngenhlamvu ngesikhathi le ndoda ibheke phambili. Izihambeli ezingaphakathi kwendawo zithukile. Abaningi bashona ngaphansi kwamatafula njengoba amaqembu onogada engena.
UTrump obehamba neNkosikazi yakhe uMelania Trump kanye nezikhulu eziphezulu, uphuthunyiswe endaweni ephephile.
Ekhuluma kamuva eWhite House, uTrump wathi umhlaseli kukholakala ukuthi ubezenzela yena yedwa. Umchaze “njengobezobulala”.
Uthe uqale wacabanga ukuthi umsindo yinto ewayo ngaphambi kokuthi abone ukuthi wukuqhuma kwezibhamu.
Amaphoyisa akuqinisekisile ukuthi umsolwa udutshulwe wavalelwa endaweni yesigameko. Kulindeleke ukuthi avele enkantolo ngoMsombuluko ngamacala ahlobene nezibhamu nokudubula.
Isikhulu samaphoyisa eWashington uJeffery Carroll uthe amaphoyisa adubulana nomsolwa. Iphoyisa leSecret Service lishaywe ivesti laphuthunyiswa esibhedlela kodwa liyalulama.
Iziphathimandla zithe umsolwa kubukeka sengathi kade ehlala ehhotela. Kamuva abaphenyi basesha umuzi oseTorrance, eCalifornia oxhumene naleli cala.
Imibiko iveze umsolwa njengo-Cole Tomas Allen (31)kodwa iFederal Bureau of Investigation ayizange ikuqinisekise lokhu.
Lo mcimbi ubuhanjelwe ngamakhulu ezihambeli okubalwa kuzo osopolitiki, izintatheli nezikhulu zomphakathi. Amalungu eKhabhinethi aphuthunyiswe ngaphandle njengoba ukudideka bekukuningi.
Akukhona okokuqala uTrump ebhekana nengozi. Ngo-2024, ushayasibhamu wavulela ngenhlamvu embuthanweni owawusePennsylvania, kwashona umuntu oyedwa kwalimala noTrump.
IWashington Hilton yaziwa nangokuthi yasiza lapho uMengameli uRonald Reagan adutshulwa khona ngo-1981.
Ngaphandle kokwesaba, uTrump uthe uhlela ukuphinda abambe isidlo sakusihlwa kungakapheli inyanga.
Esithombeni esingenhla: UMengameli uDonald Trump kanye Nonkosikazi Wokuqala uMelania
Umthombo wesithombe: Ifayela