Lubhalwe nguDylan Bettencourt
Umqeqeshi weBafana, uHugo Broos, ukhiphe abadlali abahlanganisa uSipho Chaine no-Elias Mokwana eqenjini lakhe elidlale imidlalo yobungani yase-Panama ngenxa yokungaziphathi kahle.
Abasha ababiziwe kubalwa unozinti weSekhukhune United uRenaldo Leaner, uJayden Adams weMamelodi Sundowns noThemba Zwane nomgadli uBongokuhle Hlongwane.
UHugo Broos ukhiphe abadlali abaningi eqenjini leBafana Bafana elizodlala ne-Panama kule nyanga ngenxa yokungaziphathi kahle ku-Africa Cup of Nations (Afcon) eMorocco.
IBafana ihlulwe ngo 2-1 yiCameroon ku-last 16. UBroos nephini lomqeqeshi uHelman Mkhalele babuyekeze okungahambanga kahle ngemuva kokubuyela ekhaya.
“Sicubungule okwenzeke kwi-Afcon ngemuva nje kokuthi sibuyile sabona izinto ebezingeke zisenzeka,” kusho uBroos, kubika i TimesLive. “Ngiyethemba ukuthi abafana abangekho bazozibuka esibukweni babuze, ‘Kungani ngingekho eqenjini lesizwe?’
Kwabashiywe ngaphandle kukhona uSipho Chaine, uSiyabonga Ngezana, uSipho Mbule, uBathusi Aubaas, uMohau Nkota, u-Elias Mokwana nomgadli u-Iqraam Rayners. Akubona bonke abalahlwa ngenxa yokungaziphathi kahle. Ezinye izinguquko zimayelana nefomu entsha.
“Kumele ube nokuziphatha ngendlela efanele. Uma ungenaso isimilo sokufika ngesikhathi, ngeke ube naso isimilo sokulandela imiyalelo enkundleni,” kusho uBroos.
Uthe izinto bezingahambi kahle enkundleni, yingakho iBafana ingenzanga kahle ku-Afcon.
Abadlali abangenayo kubalwa unozinti weSekhukhune United uRenaldo Leaner, umdlali wasemuva weHannover 96 u-Ime Okon, abadlali basesiswini beMamelodi Sundowns uJayden Adams noThemba Zwane, umgadli weMinnesota United uBongokuhle Hlongwane nomdlali wasemuva we-Aris Limassol uThapelo Maseko.
U-Adams noMbekezeli Mbokazi phambilini baphuthelwe yizindiza noma bafika sekwephuzile ekhempini. “Ngicabanga ukuthi bazifundile izifundo zabo,” kusho uBroos.
UZwane uphuthelwe yi-Afcon yokugcina ngemuva kokubuya ekulimaleni sekudlule isikhathi ukuthi angathathwa. UBroos uthe akanqeni ukuqoka uZwane uma esekulungele futhi unethemba lokuthi uzoba naye eNdebeni yoMhlaba.
Esithombeni esingenhla: Umqeqeshi weBafana Bafana uHugo Broos.
Umthombo wesithombe: Ifayela