ENquthu: OwayeyiMeya ye-IFP neyaduma ngokuthatha iketango lobuMeya yayolibika esibayeni,isibuyele kuleli qembu ngemumva kweminyaka yaxoshwa.
UMnuz Mabilabila Kunene ubonakale ezinsukwini kweminye yemibuthano ye-IFP emukelwa njengelunga elisha nelisuka eqenjini i-ABC.
Lo mholi wayekade eyiMeya ye-NFP eNquthu nokwathi uma eyilaxaza,ebuyela ku-IFP ngonyaka ka-2017,wanqoba ukhetho olwalungundabamlonyeni eNingizimu Afrika njengoba iNquthu kwaba yiyo yodwa eyahlulwa ukuhlalisa umkhandlu ngemuva kokhetho lwango-2017. Yilaphoke okuthiwa wabuya khona wagila izimanga wathatha iketanga lobuMeya wayobikela amadlozi ukuthi useqokiwe. UMabilabila uxoshwe ku-IFP ngemumva kwezinsolo zokugqoka izikibha zikaMengameli uVelenkosini Hlabisa esikhundleni sezinobuso bukaMntwana wakwaPhindangene.
EThekwini: INkantolo Yesifunda saseThekwini igwebe uMapi Mhle Goba oneminyaka engu-40 ubudala udilikajele ngemuva kokuvuma icala lokubulala uNondumiso Sbahle Dlamini oneminyaka engu-21 ubudala ngoMandulo ka-2025 eduze no-Edwin Swales Highway.
Ekuvumeni kwakhe icala, uGoba uthe wahlangana nomufi endaweni yaseMayville ngomhlaka-12 kuMandulo ka-2025, ngemuva kokuba behlele ukuya ethaveni ndawonye. Ngemva kokuba bobabili sebedle amanzi ampojwana, kwaqubuka ingxabano ngemali okusolwa ukuthi ilahlekile ekamelweni lakhe. Lapho umufi emmemeza, wamgwaza entanyeni wawela ehlathini. UGoba wehluleka ukubika ngalesi sigameko futhi wadalula indawo yesidumbu sakhe ngemuva kokuboshwa kwakhe, amaphoyisa athola imzimba usuqalile ukubola.
EMgungundlovu: Izenzo zobugebengu eMgungundlovu nasezindaweni ezizungezile zikaMasipala Wesifunda saseMgungundlovu ziphoqe ubuholi bendawo ukuba bufune ukungenelela kwePhini likaMengameli uPaul Mashatile.
UMeya wesifunda uMzi Zuma, ngaphansi komthwalo wakhe wemfanelo, umeme iPhini likaMengameli ukuthi lisize uMengameli ekuqaliseni iModeli Yokuthuthukiswa Kwesifunda, ukuthuthukisa ukusebenza komasipala kanye nokubhekana nezinkinga zomphakathi okuhlanganisa amazinga aphezulu obugebengu, ukwehluleka kokulethwa kwezinsizakalo, ukungasebenzi kanye nobumpofu. Kulindeleke ukuthi uMashatile ahlangane namalungu omphakathi kanye nezinhlaka zokulwa nobugebengu kuleli sonto ukuze kuxoxwe ngezinhlelo zokulwa nobhubhane olusongela abantu abavamile kanye namabhizinisi.
Esithombeni esingenhla: Owayengumeya waseNquthu uMabilabila Kunene, owathatha iketango lobumeya waya nalo endlini yomndeni wakhe, usebuyele kwi-IFP ngemuva kokuxoshwa eminyakeni eminingana edlule.
Umthombo wesithombe: Umasipala Wendawo waseNquthu