Lubhalwe ngu-Anita Dangazele
Abazali bakaCwecwe bathole ukuthi owesilisa ogama lakhe nguMehmet ubhalise isisekelo esebenzisa igama lendodakazi yabo ngaphandle kwemvume.
Umndeni uzakhela esawo isisekelo esisemthethweni futhi uxwayisa umphakathi ngokusekela amaphrojekthi angagunyaziwe axhaphaza igama lendodakazi yabo.
Bathukuthele bayaveva abazali bengane eneminyaka eyisikhombisa uCwecwe okusolakala ukuthi yadlwengulwa e-Bergview College e-Matatiele ngemuva kokuthola ukuthi kunowesilisa obhalise isisekelo egameni lendodakazi yabo ngaphandle kwemvume yabo.
Umama kaCwecwe wabelane ngezithombe ku-Facebook ekhombisa izingxoxo nalo muntu, ohlonzwe ngokuthi nguMehmet kuphela.
“Lo muntu ubekhuluma ngesibindi ukuthi uCwecwe akulona igama lendodakazi yethu futhi esesabisa. Ukube bekungaziwa kabanzi ngodaba lukaCwecwe ubezokwazi kanjani igama lakhe? Igama lendodakazi yethu uCwecwe, sizolivikela kanzima ifa layo kulabo abafuna ukulixhaphaza ukuze bathole inzuzo,” basho kanje.
Abazali bathe bazobikela i-Companies and Intellectual Property Commission uma isisekelo sibhaliswe ngaphandle kwemvume yabo.
Bathe bayayichitha yonke imizamo yokuqongelela imali kusetshenziswa igama lendodakazi yabo ukuze bathole inzuzo.
Ngokusho kwabazali, uMehmet waze wazama ukubacindezela ukuthi babe ama-CEO esisekelo esingagunyaziwe.
Umndeni uveze ukuthi usezinhlelweni zokubhalisa isisekelo sawo wanxusa umphakathi ukuthi ungasekeli ezinye izinhlangano ezithi zimele uCwecwe.
Banxuse abantu ukuthi bame nabo ekuvikeleni igama lendodakazi yabo.
Esithombeni esingenhla: i-poster #JusticeforCwecwe.
Umthombo wesithombe: i-Facebook