Lubhalwe ngu-Everson Luhanga
Abesifazane abayisithupha base-Alexandra bathi kunyamalale imali engaphezu kuka-R80 000 kwi-account yabo yesitokofela ngemuva kokuthi u-Ella Sepuru efake imali kwi-account yendodakazi yakhe uTshegofatso Wendy Sepuru.
UTshegofatso Wendy Sepuru utshele abantu ku-inthanethi ukuthi uphephile, kodwa akazange anikeze isizathu esicacile sokulahleka kwemali ngemuva kokuveza ibhalansi yasebhange engu-R76 600.
Abesifazane abayisithupha e-Alexandra bachitha unyaka wonke bebekela eceleni imali yesitokofela sabo. Bahlele ukuyihlukanisa ngoLwezi.
Kodwa ngesikhathi kufika usuku olukhulu, imali ibingekho. Iqembu belithembele ku-Ella Sepuru ukuthi uzogcina imali yalo iphephile.
U-Ella wafaka imali ku-account yendodakazi yakhe uTshegofatso Wendy Sepuru.
Ngesikhathi laba besifazane behlangana ngesonto eledlule, uWendy akafikanga.
U-R80 000 nawo ulahlekile. U-Ella uthe uWendy waphuma endaweni ayeqashwe kuyo eTsutsumani ngaphandle kwezingane zakhe ezimbili, ezineminyaka eyishumi neyisikhombisa.
U-Ella uthe uphoxeke kakhulu.
Ekhathazekile ngendodakazi yakhe, u-Ella wacela iScrolllla.Africa ukuthi ithumele isexwayiso somuntu olahlekile. Ngokushesha ngemva kokuba isexwayiso siphume, uWendy waphendula kuma-comments.
Uthe uyaphila wacela abantu ukuthi bayeke ukwabelana ngale-post.
Elinye lamalungu esitokofela lisitshele ukuthi imali elahlekile ishiye iqembu likhihla isililo.
Uthe balambe phakathi nonyaka ukuze bakwazi ukonga.
Uphinde wathi u-Ella kwakungamele afake imali ababeyilondolozile ku-account kaWendy engabatshelanga.
Ebuzwa ukuthi uyithatheleni le mali uWendy waphika.
Watshela umama wakhe ukuthi uzovakashela umngane wakhe e-Roodepoort.
Kamuva wathi useGoli kodwa wenqaba ukusho indawo yakhe.
Ngesikhathi bexoxa, uWendy uthumele isithombe se-screenshort sibonisa imali esele yasebhange engu-R76 600 ngoNcwaba.
Ebuzwa ngale mali uthe wayithola ndawana thize kodwa wangachaza kabanzi. UWendy naye uthe akasebenzi.
Esithombeni esingenhla: Abesifazane base-Alexandra bathi imali yabo yesitokofela yanyamalala ngemva kokufakwa ku-account yelungu lomndeni.
Umthombo wesithombe: Sithunyelwe