Dylan Bettencourt
Amalungu amahlanu eqembu labesifazane abaneminyaka engaphansi kwengu-20 ayebaleke e-Eritrea ngesikhathi somqhudelwano owawuse-Uganda ngonyaka odlule namanje asacashile.
1.Laba badlali abahlanu kuthiwa baphephile futhi baphila saka ngemuva kokubaleka amahora ngaphambi komdlalo wabo we-Council for East and Central Africa Football Associations (Cecafa) ye-Women’s Under-20 Championship ngoLwezi nyakenye ngokusho kwe-Guardian.
Babalelwa ku-60 abadlali bebhola asebephunyukile e-Eritrea bezama ukubalekela umbuso nomthetho kaMengameli u-Isaiahs Afwerki kusukela ngonyaka ka-2009, kodwa icala lokuqala leli elithinta abadlali besifazane.
I-Federation of Uganda Football (Fufa) isungule uphenyo ngabadlali abalahlekile, kodwa okhulumela u-Ahmed Hussein uthe udaba ludluliselwe emaphoyiseni ase-Uganda.
“Kungaphandle kwamandla ethu lokhu okwenzekayo.”
Umqondisi we-Cecafa u-Auka Gecheo uthe ukuduka kuphenywe yizo zonke izinhlaka ezifanele.
“Njengabagqugquzeli bomqhudelwano sizibikele iziphathimandla ngokunyamalala kwabadlali saphinde sabasiza ngemininingwane ebidingeka,” kusho u-Auka.
Isazi esikhethekile seNhlangano Yezizwe Ezihlangene mayelana namalungelo abantu e-Eritrea sikhiphe umbiko mayelana nokukhathazeka ezweni lonke.
Umbiko ukhombisa izimo ezifana nokuthwalwa ngempoqo, ukuboshwa ngokungafanele, ukunyamalala nokuhlukunyezwa.
I-Eritrea iyizwe elincane elisoPhondweni Lwe-Afrika elinabantu abangaphansi kwezigidi eziyisithupha. Ayikalubambi ukhetho selokhu yathola inkululeko ngo-1993.
Umbiko wengeze ngokuthi izingane ezineminyaka engu-14 ubudala zibhaliswa ukuba ngamasosha azolwa empini yesizwe ne-Ethiopia.
“Ngisakhathazeke kakhulu ngesimo sabantu base-Eritrea abadukile kanye nababoshiwe ngokungafanele emajele ayimfihlo ngokwephula imithetho yamalungelo abantu,” kubhala u-Mohamed Abdelsalam Babiker embikweni othunyelwe uMkhandlu Wamalungelo Abantu weNhlangano Yeziwe Ezihlangene.
Umthombo wesithombe: @