Lubhalwe nguZukile Majova
Kusekude ukuphela ukucishwa kukagesi njengoba u-Eskom ethi iziteshi zakhe zikagesi ezibalulekile eziyisithupha zidinga ukulungiswa ngokushesha.
Kulo nyaka, ikakhulukazi njengoba kuyiwa okhethweni lwangomhlaka-29 kuNhlaba, kubikwe ukuthi lona unyaka uhulumeni azoqeda ngawo ukucishwa kukagesi.
Kodwa kubukeka sengathi ngomunye weminyaka emibi kakhulu yokucishwa kukagesi.
Futhi kuba kubi nakakhulu.
UNgqongqoshe kagesi uKgosientsho Ramokgopa utshele isithangami sabezindaba nge-Energy Action Plan ukuthi ngaphambi kwesidingo esikhulu esihambisana nezinyanga zasebusika, iziteshi zikagesi eziyisithupha zidinga ukulungiswa ngokushesha.
“Sihlonze iziteshi eziphehla ugesi eziyisithupha ezidinga ukunakwa ngokushesha ngoba zingase zisinikeze inzuzo engcono kakhulu.
“Phakathi kwalezi ziteshi zikagesi iThuthuka, i-Kendal, iKusile kanye neMajuba yizona esilindele ukuthi zizosisebenzela kahle,” kusho uRamokgopa.
Uthe zonke lezi iziteshi zakwa-Eskom zidinga ukulungiswa ngaphambi kobusika.
UNgqongqoshe uphinde wathembisa ukuthi ukucishwa kukagesi angeke kubi kangako kulobu busika obuzayo, kusukela ngoNhlaba kuya kuNcwaba.
“Nizobona ukuthi njengoba singena enkathini yasebusika … sizokwehlisa ukunqamula kwethu ukuhlela futhi njengoba sikwehlisa kusho ukuthi sikhuphuka ngomthamo otholakalayo ukuze ukwazi ukuhlangabezana nezidingo futhi asikuboni ukuqina kokucishwa kukagesi.”
Isikhulu esiphezulu sakwa-Eskom uBheki Nxumalo uthe iziteshi ezifana ne-Kendal kanye neThuthuka “azikathuthuki njengoba bekulindelekile”.
“Siyaqonda ukuthi kungani. NgeThuthuka… siyaqala ukusebenzisa lawo mayunithi ngakho ezinyangeni ezimbili ezizayo, sibhekene nesikhathi esikhulu sokusebenza. Silindele ukuthi iThuthuka iqale ukwenza kangcono kakhulu.
“I-Kendal – siyaziqonda izinkinga ezikhona futhi manje sesiqala nokusebenzisa amayunithi. Sibhekene nakho ukulahlekelwa ingxenye kanye nokungatholakali,” kuchaza uNxumalo.
Esithombeni esingenhla: UNgqongqoshe kaGesi uKgosientsho Ramokgopa etshela abezindaba ngohlelo lukahulumeni lokusebenza kwezamandla.
Umthombo wesithombe: X