Lubhalwe nguCelani Sikhakhane
Zisenkingeni izikhulu zikamasipala weTheku ezahoxisa ithenda yezigidi yenkampani iPholobas Project njengoba uNgqongqoshe wezokuBusa nokuBambisana neziNdaba zoMdabu ekhiphe umyalelo wokuba kube yizo ezikhipha emaphaketheni azo imali ebalelwa ku-R52 million yale nkampani.
Lokhu kulandela ukuthi iPholobas eyayenza umsebenzi ka-R30 million kagesi EThekwini inqobe icala eNkantolo yoMthethosisekelo ngoLwesithathu ngokuphucwa kwayo lo msebenzi ngo-2013 kungalandelwanga imigudu.
AmaJaji aseNkantolo yoMthethosisekelo akhiphe umyalelo wokuthi imasipala weTheku kuzomele ukhokhele iPholobas Project imali yayo kusuka ngo-2013 kuze kube manje engu-R30 million kanye nenzalo ngaphezulu nokuzokwenza igcine isibalelwa ku-R52 million.
UMfundisi uThulasizwe Buthelezi uthe usebhalele uMeya waseThekwini uMnuz Cyril Xaba ukuba kwenziwe uhlelo olusemthethweni lokuba izikhulu ezithintekayo kube yizo ezikhokha le mali ukuze kugwemeke ukuchithwa kwemali yabakhokhi bentela ngobudedengu bazo.
“Ngibhalele uMeya waseThekwini ukhansela uXaba ukuba kube nohlelo lokuthi le mali ingabi umthwalo wabakhokhi bentela kodwa akuthathwe emaphaketheni alezizikhulu ezababudedengu njengoba umasipala ususehlazweni elingaka,” kusho UButhelezi.