Kuze kube manje kulo nyaka, zingu-333 izingane ezilashelwe amanxeba okudutshulwa eWestern Cape, ngokusho koMnyango wezeMpilo esifundazweni.
Iningi lalezi zingane ezilimele kuthiwa kungenxa yodlame lwamaqembu ezigelekeqe ezindaweni ezifana neHanover Park, eManenberg, e-Eerste River, eMitchells Plain, eKhayelitsha naseNyanga.
Kusukela ngomhlaka-kuMasingana kuya kumhlaka-12 kuNhlangulana, izingane ezingu-58 zishonile ngenxa yokudutshulwa. Kulaba bekukhona izingane ezintathu ezineminyaka engaphansi kwemithathu. UMnyango ubike ukuthi zingu-83 izingane ezashona ngenxa yezibhamu ngo-2022 nezingu-89 ngo-2023.
Isibhedlela iRed Cross War Memorial Children’s Hospital sithole ukuthi ukulimala kwezingane eziningi mekungahlosiwe futhi zidubuleka ngesikhathi kusuke kudubulana izigelekeqe.
Ngomhlaka-9 kuNhlangulana u-Enzokuhle Dladlu (4) noLunje Chomo (10) badutshulwa eKhayelitsha. ULunje wabulawa esalinde ukugunda, kwathi u-Enzokuhle washaywa inhlamvu edlala ngaphandle.
Ngomhla ziyisishiyabalombili kuNhlaba, uLoyola Gwadiso (8) nomfowabo ononyaka uKhanide badutshulwa bedlala ngaphandle eGugulethu. Zombili izingane zilimele kanzima.
Ngomhlaka-19 kuMbasa, uZamawushe Momoti (16) wadutshulwa wabulawa ezihambela eya esikoleni sakhe ePhilippi ngesikhathi kulwa izigelekeqe.
ULizette Lancaster we-Institute for Security Studies uveze ukuthi izigameko eziningi zokubulawa kwezingane nokuzama ukubulala zibandakanya ukudubula. Ngokwesilinganiso kubulawe izingane ezintathu kanti ezine ziyizisulu zokuzama ukubulala nsuku zonke eNingizimu Afrika.
IGunFree SA ibike ukuthi kusukela ngo-2014, amanxeba okudutshulwa yiwona ayimbangela ehamba phambili yokubulawa kwezingane okungahlobene nokuhlukumeza (49.2%).
Ucwaningo olwenziwa esibhedlela iRed Cross War Memorial Children’s Hospital luthole ukuthi phakathi kuka-2001 no-2011, izingane ezingu-163 zelashelwe ukulimala ngokudutshulwa, eziningi ziphakathi kweminyaka eyisishiyagalombili nengu-12 ubudala.
Luhlanganiswe ngumbhali we-Staff
Isithombe ngenhla: Nyanga.
Umthombo: Flickr