Celani Sikhakhane
Ukwenqaba kwe-Sibanye-Stillwater ukwenyusa amaholo abasebenzi basemayini ngo-R1 000 kulahlekisele imayini ithuba lokusebenzisa lokunyusa intengo yegolide ne-platinum emhlabeni.
NgoLwesibili izingxoxo phakathi kwezinyunyana zabasebenzi nomqashi zifike kwangqingetshe ngesikhathi izinhlangothi zombili zihluleka ukufinyelela esivumelwaneni.
Ngokombiko we-Business Live isiteleka sesilahlekisele abaqashi imali engu-R1 billion njengoba ngoLwesithathu kube yisonto leshumi isiteleka siqalile.
Abasebenzi bafuna ukunyuselwa u-R1 000 ngenyanga iminyaka emithathu.
Le nkampani ithi izokhipha u-R850 ngenyanga kanti ithi ayikwazi ukumelana nezidingo ngenxa yokuthi singaphezulu ngamaphuzu amane kunesilinganiso sokwehla kwamandla emali esabikezelwa yiBhange Lombuso laseNingizimu Afrika.
Abasebenzi bathi lokhu kunyuswa kwemiholo akuyilutho uma kuqhathaniswa nomholo womphathi we-Sibanye-Stillwater uMnu Neal Fronman owahole u-R300 million ngonyaka odlule.
UNobhala-Jikelele we-Association of Mine Workers and Construction Union (i-Amcu), uMnu Jeff Mphahlele, uthe asikho isivumelwano okufinyelelwe kuso kulo mhlangano.
Izimbangi zabo, i-National Union of Mineworkers (i-NUM) nayo ayineme ngezingxoxo zangoLwesibili.
UNobhala-Jikelele wayo, uMnu William Mabapa, uthe basazoxoxisana ngokunyuswa kuka-R1 000 ngenyanga iminyaka emithathu.
Le nkampani ithe imisebenzi yayo yegolide izoqhubeka kuphela uma abasebenzi sebenqume ukubuyela emsebenzini.
Ukukhiqizwa kwegolide kwenza cishe u-7% wenzuzo ye-Sibanye-Stillwater.
.
