Lubhalwe ngu-Everson Luhanga
Amaphoyisa aseGoli aphume umkhankaso wokuthungatha iqembu labasolwa abadubule babulala abantu abane e-Diepsloot ngoMgqibelo ebusuku.
Okhulumela amaphoyisa esifundazweni uBrigadier Brenda Muridili uziqinisekisile lezi zigameko.
“Amaphoyisa aseGoli athungatha abasolwa ngemuva kokuthi kudutshulwe kubulawe abantu abane ezigamekweni ezahlukene e-Diepsloot ngempelasonto edlule” esho.
“Kwesinye sezigameko, kudunwe imoto kamufi, wadutshulwa wase eyabulawa. Imoto eduniwe itholakale ishiyiwe e-Tembisa.”
UMuridili uthe kwezinye izigameko izisulu ziphucwe izimpahla zazo, zadutshulwa zase ziyabulawa.
“Okwamanje ngeke kuqinisekiswe uphenyo uma izigameko zingamataniswa nabenzi bobubi,” esho.
I-Scrolla.Africa sikhiphe udaba lokubulawa kwabantu ngeSonto.
Umholi womphakathi uLoyiso Toyiya uthe bazosebenzisana neziphathimandla ukuze kutholakale izigilamkhuba.
“Sihlukumezekile ngokushona kwabantu abaningi kangaka ebusuku, akwamukelekile lokhu futhi sidinga usizo lwamaphoyisa ukuze kubanjwe abenzi bobubi,” esho.
Esithombeni esingenhla: Omunye wabashonile u-Abel Sithole owaziwa ngelika-Absa udutshulwe ngabantu ababalelwa kwabayishumi ngoMgqibelo ebusuku.
Umthombo wesithombe: Sithunyelwe