Wamukelwe ngemfudumalo uMswane

Celani Sikhakhane

Ebuyela ekhaya okokuqala selokhu athola isicoco sikanobuhle waseNingizimu Afrika waphinde waphuma isibili emqhudelwaneni kaMiss Universe, uLalela Mswane ujabule ngokwamukelwa ngemfudumalo esifundazweni sangakubo iKwaZulu-Natali. 

NgoLwesihlanu, uMswane wamukelwe njengeqhawe uMasipala oholwa i-IFP iKing Cetshwayo esikhumulweni sezindiza i-King Shaka International.

UMswane wanqaba ukulalela imiyalelo kahulumeni waseNingizimu Afrika kanye nezishoshovu zokuthi angabambi iqhaza emqhudelwaneni ka-Miss Universe obuse-Israel ngoZibandlela.

Lesi sinqumo senziwa ngokubambisana ne-Palestine, esisondelene kakhulu ne-ANC.

UMswane uthe uhambo lokungenela uMiss Universe libe ithuba elihle kakhulu empilweni yakhe.

Uphinde wasola abamgxekayo abakade bemhlasela ngoba bembona engumuntu ongangeneka kalula.

NgeSonto uMswane uvakashele iSilo samaBandla uMisuzulu kaZwelithini esigodlweni sakwaKhangelamankengane.

“Lokhu kube into ebijabulisa kakhulu ukwamukelwa ngemfudumalo, kusho uMswane.

“Ngijabule kakhulu ngokubuyela ekhaya ngemuva kokwesekwa okukhulu engikuthole ngesikhathi ngingenele umncintiswano wonobuhle waseNingizimu Afrika kanye no-Miss Universe, ikakhulukazi ngoba asikaze sibe nesicoco KwaZulu-Natali kusukela ngonyaka ka-2008, ngakho-ke lokhu bekuyikhethelo,” kusho uMswane.

“Namantombazane amancane aKwaZulu-Natali asebonile ukuthi uma ngingakwazi ukungenela lo mncintiswano nabo bangakwazi,” kusho uLalela.

UMswane ulethe isicoco sikanobuhle waseNingizimu Afrika esifundazweni sangakubo ngemuva kweminyaka engu-12 lo mcimbi wonobuhle wagcina ukuwinwa ngumuntu waKwaZulu-Natali.

Wazalwa ngonyaka ka-1997, ungowaseMpangeni, enyakatho neKwaZulu-Natali. 

Bekungokokuqala ebuyela ekhaya ngemuva kokuya e-Israel emqhudelwaneni ka-Miss Universe.

Izihloko zakamuva