Lubhalwe nguZukile Majova
Umhleli Wezepolitiki
● UJacob Zuma unikeza i-ANC kuze kuphele uMasingana ukuthi imbuyisele njengelungu leqembu kungenjalo uzoyithathela izinyathelo zomthetho.
● Iqembu lakhe iMK lathola amavoti angu-45% eKZN kodwa lidonsa kanzima okhethweni lokuchibiyela ngaphandle kwesifundazwe.
UJacob Zuma ufuna ukuqhubeka nokuba yilungu le-ANC yize ehola iqembu eliyimbangi elahlwitha amavoti amaningi e-ANC okhethweni olwedlule.
Lowo owayengumengameli waxoshwa ku-ANC ngoNtulikazi emuva kokusungula iqembu le-MK, athi lizohlenga i-ANC kubantu abathembeke kosomabhizinisi abamhlophe.
Lokho kwasiza iMK yawina amavoti angu-15% kuzwelonke kanye nangu-45% KwaZulu-Natal.
Kodwa kusukela ekuxoshweni kwakhe, iMK ithwale kanzima ukuzuza ukwesekwa ngale kwe-KZN, njengoba iwine ukhetho lokuchibiyela ezindaweni ezimbili kuphela – eMzumbe, eKZN nase-Marikana, e-Rustenburg.
NgoLwesithathu, uZuma usabise ngokuthi uzoyisa i-ANC enkantolo uma ingakuhoxisi ukuxoshwa kwakhe ekupheleni kukaMasingana.
UNobhala-Jikelele we-ANC, uMnuz Fikile Mbalula, ube esephendula washiya angalazi.
“Ubenethuba lokuthumela incwadi yakhe yothando ezinsukwini eziningi ezedlule. Kodwa akazange akwenze lokho manje usekhethe lolu suku,” esho.
UMbalula ubekhuluma ngomhla ziyisishiyagalombili kuMasingana okuwusuku olubalulekile ekhalendeni le-ANC njengoba yasungulwa ngalolu suku eminyakeni engu-113 edlule esontweni e-Mangaung.
“Usebenza kanjalo-ke, ikhehla elikhohlakele, elingenasimilo, elingenangqondo eliphila ngokungezwani ngenxa yokuzicabangela lona.”
I-ANC ithi uZuma udide abalandeli bayo bacabanga ukuthi iqembu lakhe elisha lisiza i-ANC.
Ngaphandle kobulungu be-ANC, uZuma akakwazi ukuqhubeka ethi iMK yasungulwa ukuze ihlenge iqembu elibusayo ekulahlekelweni amandla.
Esithombeni esingenhla: Owayengumengameli uJacob Zuma.
Umthombo: Ifayela