Farida Joyce
Umlingisi wakuleli ophinde abe ngumsakazi wezindaba uSalamina Mosese usephenduke usaziwayo ngokushicilela incwadi yezingane.
Umama wezingane ezimbili umemezele ezinkundleni zokuxhumana ukuthi usengumbhali njengoba incwadi yakhe yokuqala ethi “Disaster at Gogo’s Spaza” izokwethulwa ngasekupheleni kwaleli sonto.
Lo mlingisi oneminyaka engu-39 ubudala owaziwa kakhulu ngokudlala kwi-7de Laan, i-Soul Buddyz, ne-Backstage ujabule kakhulu ngalo msebenzi asewuqalile.
Ukwethulwa kwencwadi kuzokwenziwa ngomhlaka-16 kuNtulilazi e-Exclusive Books e-Melrose Arch kanti le ncwadi izofika ezitolo ngomhlaka-20 kuNtulikazi.
UMosese uthe abashana bakhe kanye nendodakazi yakhe uTumi babambe iqhaza elikhulu kule ncwadi.
“Bengifuna ukubhala incwadi eveza ubuhle bobudlelwano bezingane kanjalo nasemphakathini,” kusho lo mlingisi.
Uqhube wathi ekudwebeni umlingisi kaGogo kule ncwadi ukhunjuzwe ngobudlelwano obujabulisayo abenabo nogogo wakhe ongasekho.
“Ngiyazi ukuthi uyamamatheka esezulwini ngoba ubehlale engikhuthaza ukuthi ngiqhubeke nokuzama izinto ezintsha kanti lokhu kuyisahluko esisha empilweni yami.