Ummeli mbumbulu uzenza umfowabo osashona

Lubhalwe ngu-Everson Luhanga

UDoctor Sobetha owesilisa oboshwe eNkantolo yeMantshi yase-Bethal ngeledlule ngemuva kokuzenza ummeli mbumbulu, kusolakala ukuthi ubezama ukuthola incwadi yomngcwabo ngomgunyathi ngemuva kokushona ngendlela engaqondakali kwewele lakhe.

Umndeni walo wesilisa utshele i-Scrolla.Africa ukuthi uSobetha wazama ukufuna inkokhelo kumshwalense wewele lakhe, uTeacher Professor Matshia, owashona ngomhlaka-30 kuZibandlela watholakala emathuneni ngaphakathi emotweni eshile.

Lamawele abesebenzisa izibongo ezahlukene njengoba omunye esebenzise esikanina kanti omunye ubesebenzisaesikababa.

Ngemuva kwezinsuku eziyishumi nanye eshonile umfowabo, uSobetha wafonela inkampani yomshwalense ezenza umfowabo kanti wayefuna ukushintsha umshwalense ukuze kube nguye ozuzayo.

Uphenyo ngokushona kukaMatshia lusaqhubeka. Akekho osaboshiwe kanti umndeni usalinde izimpendulo ngokuthi ushone kanjani.

USobetha wabanjwa wamiswa inkampani yomshwalense ngokuzama ukubaqola imali yomshwalense efinyelela ku-R55,000.

Uboshwe ngoNdasa ngomhlaka-24 ngokuzenza ummeli eNkantolo yeMantshi yase-Bethal eMpumalanga.

Ubemele uMhlabuyaxega Mntungwa (37). UMntungwa ubhekene necala lokubulala owayengumphathi we-Sam Holdings, uNkosinathi Emmanuel Ngcongo owadutshulwa wabulawa ngo-2019.

Umndeni utshele i-Scrolla.Africa ukuthi ubambe ongezansi ukuzwa ngokuboshwa kwalo wesilisa. 

Bathe bashaqekile befunda ukuthi uSobetha ukhombise amaphoyisa isitifiketi sikamatikuletsheni ngesikhathi eboshwa. Bathe umfowabo akazange asiqede isikole wagcina ebangeni lesishiyagalombili.

Umndeni uthe unqabile ukukholwa amahlebezi afikile kuwo okuthi uSobetha ubevela eziNkantolo ezahlukene iTembisa Pretoria neMpumalanga egqoke ijazi labammeli.

“Besicabanga ukuthi mhlawumbe ubesiza ngemisebenzi engajwayelekile eziNkantolo ngesikhathi sizwa kuthiwa ubonakalile ngoba besazi ukuthi akafundile.”

Imniningwane enzulu ngaloludaba:

● UMatshia owayengunjiniyela kagesi wahamba ekhaya ngemuva kokuthola ucingo ngomhlaka-29 kuZibandlela olwaluthi kumele ayosiza umndeni wase-Mabopane ngokufaka izinto zikagesi.

● Ngomhlaka-30 kuZibandlela uSobetha wafonela umndeni ewazisa ukuthi uMatshia utholakale eshonile emotweni yakhe eshile.

● UMatshia wangcwatshwa mhla zizine kuNdasa ngo-2023.

● Mhla ziyishumi kuMasingana uSobetha washaya ucingo enkampanini yomshwalense ezenza uMatshia efuna ukushintsha imniningwane kumshwalensi ukuze kuzohlomula yena. Igama lalowo ohlomulayo lashintshwa ukuze uSobetha ahlomule.

● Ngomhlaka-23 kuMasingana uSobetha waphinda wafona enkampanini yomshwalense, ethi umfowabo uMatshia ushonile futhi ufuna imali ye- funeral policy ukuze asize umndeni wakhe ngokumngcwaba.

Inkampani yomshwalense yathumela amaphepha ku-Sobetha ukuze awagcwalise.

● Ngaphandle kokusihlola kahle isitifiketi sokushona, uSobetha wabathumelela isitifiketi sokushona sikaMatshia kanye nemibhalo esayiniwe ukuze bagunyaze futhi bakhulule imali.

● Inkampani yomshwalense yabe isithola ngokushesha ukuthi isitifiketi sokushona sikhombisa ukuthi uMatshia ushone ngomhlaka-30 kuZibandlela nyakenye ezinsukwini ezingu-11 ngaphambi kokuthi uSobetha, ezenze uMatshia ukuze ashintshe ozohlomula kumshwalensi. Ingabe uMatshia walushaya kanjani lolu cingo eseshonile?

Umndeni kubikwa ukuthi uvulele ilungu lawo icala lokukhwabanisa, eselivele liphenwya ngamaphoyisa kulandela umkhondo wamanye amacala okukhwabanisa.

Okhulumela oKlebe uKaputeni Dineo Lucy Sekgotodi uthe uSobetha uzobuyela eNkantolo yeMantshi yase-Bethal mhla zintathu kuMbasa ukuze azofaka isicelo sebheyili. Uphenyo lwaleli cala lusaqhubeka.

Izihloko zakamuva