Lubhalwe nguZukile Majova
USihlalo we-DA uHelen Zille uthe iqembu ngeke liphume kuhulumeni wobumbano lukazwelonke.
UZille uthi i-DA izoqhubeka nokugqugquzela uhlelo lwayo lwamathuba omsebenzi yize inqubomgomo iphazamiseka.
I-Democratic Alliance isikubeke kwacaca ukuthi ayinazo izinhlelo zokushiya kuhulumeni wobumbano kazwelonke (GNU), yize bekunengxabano esanda kuvela phakathi kwe-ANC kayo iDA.
Lokhu kulandela isinqumo se-ANC sokuhlela kabusha i-GNU ukuze ifake amaqembu amaningi angase asize i-ANC ekutheni ihlele imithetho nesabelomali ePhalamende.
Konke lokhu kuza ngemuva kwesinqumo se-DA sokuvotela ukuphikisana nohlaka lwezimali lukazwelonke, okuqubule imibuzo ngekusasa layo kuhulumeni wobumbano.
IPhini likaMengameli uMnuz Paul Mashatile ukuqinisekisile ukuthi kuzoba noshintsho kwikhabhinethi ukuze kufakwe abangani abasha be-ANC, i-RiseMzansi, i-Build One South Africa ne-ActionSA evote ne-ANC ePhalamende.
USihlalo we-DA uHelen Zille utshele abezindaba ukuthi asikaze sibe khona isinqumo sokushiya i-GNU.
“Akukaze kube nesinqumo sokushiya i-GNU ngakho-ke akumele kube nesinqumo sokuhlala ku-GNU.
“Siyaqhubeka ne-GNU, siyaqhubeka nokuphusha nokuqhuba uhlelo lokwakha amathuba emisebenzi nokukhula,” kusho yena.
UZille uvumile ukuthi ngeke kube lula ku-DA, kodwa uthe iqembu seliyisukumele inselelo yokusiza iNingizimu Afrika ikhulise umnotho wayo nokudala amathuba omsebenzi.
“Siyaqaphela ukuthi ngeke kube lula. Kodwa ukungena kwethu kwakuwukuqinisekisa ukuthi sitakula iNingizimu Afrika futhi sisebenzisa i-GNU ukuze sikhulise umnotho, sisuse izithiyo ekukhuleni komnotho kanye nokuqinisekisa ukuthi abantu abaningi bayangena emisebenzini.
“Leyo yinhloso yethu futhi yingakho sizokwenza isiqiniseko sokuthi siyayifeza,” kusho uZille etshela i-eNCA.
Yize i-DA ingakazinqobi izimpi ezinkulu zenqubomgomo ku-GNU, ikwazile ukuphusha ukuthi kube nokuvumelana.
Lokhu kubandakanya ukubonisana okwengeziwe ngomshwalense wezempilo kazwelonke kanye nokwethulwa okuyizigaba ezimbili kuMthetho Ochitshiyelwe Wemithetho Yemfundo Eyisisekelo (Basic Education Laws Amendment Act).
I-ANC iphinde yaphusha uMthetho Wokudliwa koMhlaba ngaphandle kokubonisana okuningi ne-DA.
Ukuqinisekisa abalandeli bayo ukuthi izokwazi ukulungisa i-ANC ku-GNU, i-DA kumele iwunqobe umkhankaso wayo wokuthi inganyuswa intela.
UZille uthe i-DA izolokhu ifaka ingcindezi kodwa ngeke iphume ku-GNU.
Khonamanjalo, iqembu likaMnuz Jacob Zuma uMkhonto Wesizwe (MK) lisichithile isimemo se-ANC sokudingida udaba lokwakhiwa kabusha kwe-GNU.
UNobhala we-MK, uMnuz Floyd Shivambu, uthe iqembu ngeke lisetshenziswe ukufaka ingcindezi kwi-DA kumadlelandawonye aphikisana kanye nawo ukukhushulwa kwe VAT.
Iqembu le-MK lithi limele izimfuno zabantu abaningi abamnyama kanti selisole i-ANC ngokusebenzisana ne-DA.
I-ANC kulindeleke ukuthi ibe nezingxoxo zokugcina kuleli sonto kanti ingase ifake amanye amaqembu ku-GNU, okubalwa i-Rise Mzansi, i-ActionSA ne-Build One SA.
Osesithombeni esingenhla: UHelen Zille uthi i-DA izohlala ku-GNU iqhubeke nohlelo lokufuna ukwakha amathuba emisebenzi.
Umthombo wesithombe: X