Celani Sikhakhane
Owayeyisikhulumi se-EFF aphinde abe ilungu lePhalamende uMbuyiseni Ndlozi uzidonsele amanzi ngomsele ngemuva kokukhombisa injabulo ngomlilo oqubuke ePhalamende likazwelonke.
UNdlozi uthe ukuqubuka komlilo kuwuphawu lokuthi iPhalamende kumele lakhiwe kabusha endaweni yase-Tshwane.
Ilungu lePhalamende libhale ku-Twitter ukuthi umbuso akumele uzihluphe ngokulungisa ibhilidi lePhalamende eliqale ukusha ngeSonto ekuseni.
“Noma ngabe yini imbangela. Noma ngabe yiziphi izinhloso, ukuqubuka kwalo mlilo yinto enhle. Umlilo usivumela ukuthi siqale phansi.sakhe kabusha akumele balungise. IPhalamende abaliguqule libe isigcinamagugu njengoba samukela isipho somlilo omuhle kangaka. Kumele kwakhiwe isakhiwo esisha endaweni yase-Tshwane,” kubhala uNdlozi.
Phakathi kwabantu abakade becasukile kubalwa uSihlalo we-DA uHelen Zille, ogxeka uNdlozi njengoba efuna iPhalamende lakhiwe kabusha e-Gauteng.
UZille usole uNdlozi “ngokujabulela le nhlekelele” kunokuba anikeze izixazululo ezizoqinisekisa ukuthi iPhalamende liyakwazi ukuqhubeka nomsebenzi walo ngaphandle kokuphazamiseka.
UNgqongqoshe wezemisebenzi yomphakathi uPatricia De Lille uthe azikho izingxoxo esezibanjiwe mayelana nokususwa kwePhalamende lakhiwe kabusha e-Tshwane.
USotswebhu we-ANC uPemmy Majodina usichithile isinqumo sokuthi kususwe iPhalamende eKapa wathi uhulumeni akanaso isabelomali sokwenza lesi sinyathelo noma ngabe uyathanda.
“Leyo nkulumompikiswano yokususa iPhalamende eKapa lakhiwe kabusha e-Tshwane inomthelela kwezezimali kanye nomthethosisekelo. Asinaso isabelomali esanele,” kusho uMajodina.
UMajodina naye uthukuthelele uNdlozi kanye nabanye abebejabule ngalolu daba.
“Angicabangi ukuthi kulungile lokhu abakwenzayo. Kumele ngabe abantu banamahloni ngalokhu. Lesi isikhungo sethu. Leli yifa lethu.”
Amaphoyisa abophe indoda eneminyaka engu-49 ubudala ngeSonto okuzomele ivele enkantolo ngoLwesibili ngamacala okugqekeza, ukweba kanye nokushisa isakhiwo.
Uzophinde abekwe icala ngaphansi koMthetho Wamaphuzu Abalulekile Kazwelonke.