Celani Sikhakhane
Umholi we-National Freedom Party nowayeyiPhini likaNgqongqoshe Wezesayensi Nobuchwepheshe, uZanele KaMagwaza-Msibi, udlule emhlabeni eneminyaka engama-59.
UNobhala-Jikelele we-NFP, uMnu Canaan Mdletshe, ukuqinisekisile ukudlula emhlabeni kukaMagwaza-Msibi oshone ezintatha zangoMsombuluko.
Ubaziwa njengendodakazi yolahleko kaMntwana uMangosuthu Buthelezi ngemuva kokushiya kwakhe i-IFP wayosungula i-National Freedom Party ngoNhlolanja ngowezi-2011.
OkaMagwaza-Msibi wahlaselwa yisifo sohlangothi ngowezi-2014 ezinyangeni eziyisithupha nje ngemuva kokuqokwa njengePhini likaNgqongqoshe ngowayenguMengameli wangaleso sikhathi uJacob Zuma futhi akakaze alulame ngokuphelele.
Isifiso sakhe sokuba nguMengameli we-IFP saholela ekutheni axoshwe eqenjini alijoyina esamncane kakhulu.
Ngesikhathi engusihlalo kazwelonke we-IFP futhi eyiMeya kaMasipala waseZululand, waphonsela inselelo isikhundla sikaMengameli uDkt Mangosuthu Buthelezi.
OkaMagwaza-Msibi ubesolwa ngokusetshenziswa izikhulu ze-ANC uDkt Zweli Mkhize, uTokyo Sexwale kanye nosomabhizinisi uPeter Paul Ngwenya ukusungula i-NFP ukukhipha i-IFP komasipala abahlukene base-KZN.
Ubengumama womlingisi woZalo, uGugu Gumede.