Lubhalwe nguRorisang Modiba
UZandile Tembe uthi isikhathi sakhe emsakazweni Ukhozi FM siphele kabuhlungu ngemuva kokungaboni ngaso linye nabaphathi bakhe.
UZandile Tembe uthi indawo yokusebenza enobuthi yamkhipha emsakazweni Ukhozi FM ngemuva kweminyaka engu-13 ekulo msakazo.
Ukholelwa ukuthi ubudlelwano obungebuhle bakhe nowayeyimenenja uS’bongi Ngcobo kwaba neqhaza elikhulu ekuphumeni kwakhe.
Owayengumphathi wezinhlelo kuKhozi FM, uZandile Tembe, ugcine edalule ukuthi kungani ashiya kulo msakazo ngemuva kweminyaka engaphezu kweyishumi.
Engxoxweni yakhe ne-Podcast Radio & Stuff, uTembe uthe inkontileka yakhe ayizange ivuselelwe ngo-2021 ngenxa yobudlelwano obungebuhle phakathi kwakhe nowayeyimenenja uS’bongi Ngcobo.
UTembe uqale ukusebenza emsakazweni Ukhozi FM ngo-2008 wathi noma ebona ukuthi uzogcina ephumile kodwa kwakubuhlungu.
“Indawo yokusebenza ibingemnandi. Angazi ukuthi yini imbangela, kodwa ibingahlangene nomsebenzi wami,” kusho yena.
Uchaze ukuthi nakuba yena noNgcobo bake basebenza ndawonye emsakazweni i-Tru FM, izinto azihambanga kahle phakathi kwabo oKhozini.
“Besingazwani nje, nami ngakwamukela lokho,” kusho uTembe.
Uqhube wathi uNgcobo akuyena yedwa umuntu owenze izinto zaba nzima. “Indawo ibimzungezile ibinobuthi. Kwakunzima ukuqhubeka, kodwa ngazama,” kusho yena.
UTembe uthe kwakubuhlungu ukushiya umsebenzi awuthandayo. “Ngangikholelwa ukuthi ngisengakwazi ukwenza okwengeziwe. Kodwa ngangazi ukuthi angisamukelekile.”
Esikhundleni sokuqeda inyanga yakhe yokugcina ehhovisi, uTembe kwathiwa akasebenzele ekhaya. Ukholelwa ukuthi lokhu kungenxa yokuthi isiteshi besingafuni ukuthi ahlanganyele emhlanganweni wokuhlela.
“Ngaqonda ukuthi lena indlela izinto ezisebenza ngayo emhlabeni wezinkampani,” kusho yena.
Yize behlukene kodwa uTembe ukholwa wukuthi yena noNgcobo bebengenza izinto ezinkulu emsakazweni Ukhozi FM. “Kuyadabukisa ukuthi asikwazanga ukukwenza lokho.”
UNgcobo, owajoyina Ukhozi FM ngo-2018, wesule ngoLwezi ka-2024. Akaphendulanga ngesikhathi ecelwa ukuba aphawule.
Osesithombeni esingenhla: UZandile Tembe.
Umthombo wesithombe: @zandiletembe