Linda Ximba
Umsakazo Ukhozi-FM usuxoshe umphathi wawo wezinhlelo, uZandile Tembe, ngemuva kokubamba lesi sikhundla iminyaka engaphezulu kweyi-15.
Waqala ukusebenzela umsakazo woKhozi-FM njengomkhiqizi weVuka-Breafast Show esebenza noDJ Linda Sibiya owaziwa ngoMr Magic. Ngemuva kweminyaka wathola isikhundla sokuba umphathi wezinhlelo, okuyisikhundla ebesinamandla kakhulu njengoba wathola abangani kanye nezitha koDJ.
Umsebenzi wakhe wayeqasha aphinde axoshe oDJ ngemuva kokubuka indlela abazimisele ngayo ngomsebenzi wabo.
Kule minyaka ayichithe ehhovisi lakwa-SABC KwaZulu-Natali, uTembe ubehlezi evela ezindabeni esolwa ngokulwa nabaphathi bakhe.
Kuze kube imanje, kuthiwa ubengaboni ngasolinye noSbongi Ngcobo obengumphathi webhizinisi kumsakazo wesiZulu.
Bekunamahlebezi okuthi ugaqele isikhundla selokhu satholwa uBongani Mpanza, owayengumphathi woKhozi-FM, owasula ngesikhathi kukhona ukungazwani. Uyabandakanyeka kwisivumelwano esingalungile sophenyo lwangaphakathi lwangonyaka wezi-2019.
Ngesikhathi simthola ukuba aphawule, uTembe uthe: “yebo kuyiqiniso, bathe angeke bayivuselele inkontileka yami, kodwa niyakwazi lokho. Kungani ningakhulumi nabo?
Sizamile ukuthola okhulumela i-SABC uGugu Ntuli, kodwa akazange aphendule.