Lubhalwe nguRorisang Modiba
UZandie Khumalo-Gumede uthi uJub Jub usezame kaningi ukubona indodana yakhe uChristian, kodwa uKelly Khumalo uyichithile imizamo yakhe.
Usonhlalakahle uthi uKelly uphula umthetho uma evimba uJub Jub ukuthi abone ingane yakhe ngaphandle kwencwadi yenkantolo.
Umculi uZandie Khumalo-Gumede usevikele umculi uMolemo “Jub Jub” Maarohanye ethi useneminyaka ezama ukuxhumana nendodana yakhe uChristian.
NgeSonto ngomhlaka-2 kuLwezi, uJub Jub wabhala ku-Instagram ukuthi owayeyintombi yakhe uKelly Khumalo uyenqaba ukuthi abone indodana yabo. Uthe usethumele izipho, wafinyelela emndenini futhi wathembisa ukwenza amasiko, kodwa uKelly uye wayinqaba yonke imizamo.
Uthe ezinye izipho azithumelela uChristian ngesikhathi eboshiwe wazibuyisela emuva.
Ubudlelwano babo baqala ngasekupheleni kweminyaka yango-2000 kodwa baphela ngemuva kokuthi uJub Jub elahlwe yicala ngo-2010 ngengozi yemoto eyabulala izingane zesikole ezine. Kusukela lapho, uKelly ukhulise indodana yabo yedwa.
UZandie utshele iSunday World ukuthi bobabili yena nomama wakhe bazamile ukulamula laba bobabili. Uthe uJub Jub uzimisele ngokukhokha amademeshe futhi enze ukuthula nomndeni, kodwa izingxoxo zabhuntsha ngenxa yokuntula ukubambisana.
“Ngiyamkhathalela kakhulu umshana wami. UMlemo ubezama ngempela, kodwa yena noKelly banezinkinga ezingakaxazululeki,” kusho uZandie.
Wengeze ngokuthi uChristian ufuna ukubona uyise kodwa ngeke kwenzeke ngaphandle kwemvume kaKelly.
Usonhlalakahle uQueen Chauke uthe kungenzeka ukuthi uKelly wephula umthetho ngokuvimbela uJub Jub enganeni yakhe, njengoba bobabili abazali benamalungelo alinganayo.
UKelly akakaziphenduli lezi zinsolo.
Esithombeni esingenhla: UJub Jub noKelly Khumalo.
Umthombo wesithombe: Ifayela