Celani Sikhakhane
Phakathi kwabane abaqokelwe ukuba ijaji elikhulu eNkantolo YoMthethosisekelo, iJaji elinguMengameli weNkantolo ephakeme yokudluliswa kwamacala uyena yedwa owesifazane osele kulabo abazokhethwa.
IJaji uMandisa Muriel Lindelwa Maya ungelinye lamajaji amane aqokwe nguMengameli uCyril Ramaphosa ukuthi azoxoxisana naye ukuze abambe iqhaza.
Imbangi yakhe kulesi sikhundla iJaji leNkantolo yoMthethosisekelo uMbuyiseli Madlanga, ozoba nenhlolokhono yakhe yokuqala ngoLwesibili.
Laba ababili abasele abangenele ukhetho ijaji elinguMengameli woPhiko lwase-Gauteng uDustan Mlambo kanye nobephethe amajaji uRaymond Zondo.
UMengameli usewadlulisele amagama abo kukhomishana Yemisebenzi Yezobulungiswa, okuyiyo ezoqhuba inhlolokhono.
Isikhundla somphathi wamajaji sishiywe sivulekile kulandela ukusula kukaMogoeng Mogoeng ngonyaka odlule.
IJaji uMaya abaningi bambheka njengohamba phambili kulo msebenzi, ngenxa yerekhodi lakhe elihlanzekile nelingenawo amahlazo.
Umholi we-African Transformation Movement, uVuyo Zungula, naye usebhalele uMengameli uRamaphosa emcela ukuthi acabangele uJustice Maya esikhundleni esiphezulu senkantolo ephakeme yomhlaba.
“UJustice Maya wazalwa ngonyaka ka-1964 okumenza ahlanganise iminyaka engu-57. Lokhu kusho ukuthi usashisa ngasohlangothini lwakhe ukuthi asebenze ihlandla leminyaka engu-12 ngaphandle kokuphazamiseka,” kubhala uZungula.
“Akayena futhi umafikizolo eNkantolo yoMthethosisekelo. Uke wasebenza njengebamba likaMengameli wenkantolo yoMthethosisekelo. Ube ijaji kusukela ngonyaka ka-2002 futhi uneminyaka engaphezu kwengu-20 yesipiliyoni kwezobulungiswa,” kuqhuba uZungula.
Nokho umjaho uminyene ngendlela eyisimanga futhi akekho okucatshangwa ukuthi uzongenela kulesi sikhundla.
Inhlangano ebhekelele ezobulungiswa, i-Judges Matter, ithe okokuqala ngqa emlandweni, ukuthi abantu abane abakhethekile bengenele ukhetho lwezikhundla eziphezulu kwezobulungiswa bezwe.
Kulindeleke ukuthi uMengameli uCyril Ramaphosa amemezele umphathi wamajaji ngezinto eziphakamiswe ikhomishana ezizosuselwa okushiwo ithimba leKhomishana Yemisebenzi Yezobulungiswa.
.
