Zukile Majova
Abaseka uMengameli uCyril Ramaphosa baphumelele engqungqutheleni ebishubile ye-ANC yokukhetha ubuholi e-Gauteng.
UNgqongqoshe wezeMfundo uPanyaza Lesufi oweseka uMengameli uCyril Ramaphosa esifisweni sokuthatha ihlandla lesibili wehlula uLebogang Maile ekutheni abe nguSihlalo wesifundazwe.
Ubhekene nomsebenzi omkhulu wokusindisa i-ANC ekulahlekelweni isifundazwe ngenxa yomfelandawonye wamaqembu aphikisayo okhethweni oluzayo.
Iqembu lakhe lisanda kulahlekelwa oMasipala abakhulu baseGoli e-Tshwane nase-EKurhuleni.
UMaile uhalalisele uLesufi ku-twitter ethi: “Siyakuhalalisela cde Panyaza Lesufi ngokhetho lwakho njengoSihlalo wesifundazwe sase-Gauteng, ngikufisela konke okuhle mfowethu. Uqhube umkhankaso ohlanzekile ofanele umholi wenhlangano yethu. Sonke sisekela ubuholi obukhethiwe njengomsebenzi wokuthi kunqobe i-ANC ngo-2024.”
Ingqungquthela iphinde yakhetha abesifazane abathathu uNomantu Nkomo-Ralehoko iPhini likaSihlalo, uMorakana Mosupye uMgcinimafa noTasneem Motara iPhini likanobhala wesifundazwe bakhethwe ohlwini labantu abahlanu.
Isihlabani somculo nezokungcebeleka uTK Nciza uqokwe njengoNobhala wesifundazwe.
Imiphumela iyivoti elikhulu lokumethemba uRamaphosa oke waba nengcindezi yokuthi ashenxe esikhundleni kulandela izinsolo zika-$4 million epulazini lakhe i-Phala Phala eminyakeni emibili edlule.
Kuze kube manje abalandeli bakaRamaphosa abamele iqeqebana labantu abathuthukayo eqenjini le-ANC bazimisele ngokwakhiwa kabusha kwezikhundla zombuso kulandela ukulawulwa kombuso iminyaka.
Leli iqeqebana elifuna ukuthi kushushiswe labo abathinteka ekulawulweni kombuso kanye nokuphanga amabhizinisi kahulumeni.
Iqembu likaRamaphosa manje selizuze ukwesekwa e-Gauteng, e-Eastern Cape kanye ne-Limpopo njengoba kusasele izinyanga ezinhlanu nje ngaphambi kwengqungquthela yokukhetha lobuholi beqembu elibusayo ngoZibandlela.
IKwaZulu-Natal okuyisifundazwe esikhulu kunazo zonke ku-ANC ngezibalo izoba nengqungquthela yokukhetha ubuholi ngomhlaka-15 kuya kumhlaka-17 kuNtulikazi.
Izifunda ezingu-11 zisalelwe ukuphela kukaNhlangulana ukuthi ziqede ukuqokwa kwabaholi abazongenela izikhundla engqungqutheleni.
Kuze kube manje uNdunankulu uSihle Zikalala ubhekene nenselelo eqinile evela kuNgqongqoshe wezeziMali uNomusa Dube-Ncube kanye noSihlalo waMaZulu FC uSandile Zulu nalowo obekade aziwa njengothembekile kulowo owayenguMengameli uJacob Zuma.
Kulindeleke ukuthi iKwaZulu-Natal ibe isizinda sokwethulwa komkhankaso wokulwa noRamaphosa.