Lubhalwe ngu-Anita Dangazele
Usaqhubeka umbango wezomthetho phakathi kaMasipala waseNelson Mandela Bay kanye noNgqongqoshe we-Cogta e-Eastern Cape uZolile Williams njengoba bebevele eNkantolo eNkulu yase-Gqeberha ngoLwesine.
IMeya kaMasipala waseNelson Mandela Bay (NMBM), uRetief Odendaal kanye ne-Democratic Alliance (DA) kulesi sifunda banxuse iNkantolo ukuthi ivimbele uWilliams ukuba enze izichibiyelo ezizoguqula ngempumelelo uhlaka lokubusa kwedolobha lisuke ohlelweni lwekomidi liye kwisigungu esiphezulu.
Ushintsho luzophoqa ukusebenzisana kwe-ANC ne-DA, amaqembu amabili amaningi emkhandlwini anezihlalo ezingu-48 iqembu ngalinye.
Kwisigungu esiphezulu iMeya ayisenawo amandla okuthatha izinqumo eziphezulu. Izinqumo zithathwa iqembu elihlanganisa i-DA, i-ANC, i-EFF kanye ne-Northern Alliance. Wonke amanye amaqembu anezihlalo ezimbalwa ngeke akwazi ukubamba iqhaza ohlelweni lokuthatha izinqumo.
NgoZibandlela odlule, uWilliams wakhipha isaziso sesigaba-12 sokuqala koshintsho kodwa idolobha lifake lolu daba eNkantolo.
Ngomhlaka-28 ngoZibandlela iNkantolo yakhipha umyalelo ovumela u-Odendaal kanye nekomidi lakhe leMeya ukuthi bahlale kuhulumeni kuze kube kuphothulwa udaba.
INkantolo manje ibhekene nokufaneleka kwecala kanye nesikhungo sokuchitshiyelwa kwesigaba-12.
INkantolo ngoLwesine ithole ukuthi amadlelandawonye e-DA afake izincwadi ezifungelwe ezeseka isicelo sika-Odendaal kanye ne-DA.
Khonamanjalo ithimba labammeli bakaWilliams lifake isicelo sokuthi kuhoxiswe izincwadi ezifungelwe.
Ummeli kaWilliams iJaji uLulama Ngcukaitobi, uthe: “Lokhu kuyiphutha ngoba kuphula imithetho eyamukelwe mayelana nokuqulwa kwecala.”
Abahlanu abafake izicelo zokweseka u-Odendaal kanye ne-DA, i-Northern Alliance, i-Defenders of the People, i-United Democratic Movement, i-Good kanye ne-Pan-Africanist Congress of Azania.
IJaji uThandi Norman unikeze abamangalelwa izinsuku ezinhlanu ukuthi “baveze isimo sabo mayelana nokuhoxiswa kwesicelo kanye nezinsuku eziyisikhombisa uma befisa ukufaka izethulo. Bonke abafake izicelo kulindeleke ukuthi baphendule mhla ziyishumi kuNdasa.
Icala lihlehliselwe umhlaka-16 kuNdasa. Izindleko zalolu daba zigodliwe.
Esithombeni esingenhla: Amalungu e-DA kanye ne-ANC elinde ukulalelwa kodaba lwesigaba-12 phakathi kweMeya ye-NMBconcil uRetief Odendaal kanye noNgqongqoshe we-EC Cogta uZolile Williams.
Umthombo wesithombe: Anita Dangazele