Lubhalwe ngu-Everson Luhanga
Imeya yaseKurhuleni uNkosindiphile Xhakaza uqoke uXolani Khumalo njengelungu lekomiti lemeya kwizinsiza zomphakathi kanye nokuqiniswa kwemithetho ngomhlaka-17 kuNhlolanja ka-2026.
UKhumalo uvele eNkantolo yeMantshi yasePalm Ridge ngamacala okuhlasela ngalo lolo suku obekumele afungiswe ngalo.
IMeya yaseKurhuleni uNkosindiphile Xhakaza umemezele izinguquko ekomitini lakhe lemeya kusukela ngomhlaka-17 kuNhlolanja ka-2026.
“Uhlaka lokuBusa lwase-Ekurhuleni lugxile ngaphansi kwemigomo yokubumbana, uzinzo kanye nohulumeni ogxile kubantu,” kusho uXhakaza.
Omunye wabasanda kuqashwa bekunguXolani Khumalo. UXhakaza ubize uKhumalo njengelungu lekomiti lemeya (MMC) kwizinsiza zomphakathi kanye nokuqiniswa kwemithetho. Amalungu ekomiti lemeya bekulindeleke ukuthi afungiswe ngo-9 ekuseni e-OR Tambo Government Precinct.
Kodwa ekuseni ngalo lolo suku, uKhumalo ufike eNkantolo yeMantshi yasePalm Ridge ezovela khona ngamacala okuhlasela. Uzinikele emaphoyiseni ngoMasingana mayelana nalesi sigameko.
I-ActionSA iphinde yakuchitha ukuqokwa kukaKhumalo ekomitini lemeya. UMengameli we-ActionSA uHerman Mashaba uthe iqembu “liyaziqhelelanisa nesitatimende sabezindaba esingamanga mayelana nezinguquko zesigungu esiphezulu semeya.
“Ngeke sijoyine uhulumeni wakhe ohlulekayo futhi siyichithile yonke imizamo kungaba eyangasese noma esemthethweni,” kusho uMashaba.
UMashaba uthe i-ActionSA ngeke “inikeze ukwethembeka kubaphathi abengamele ukuphulwa komthetho kanye nokuwohloka kokulethwa kwezidingo”.
I-Economic Freedom Fighters (EFF) eGauteng nayo izithuchithile lezi zinguquko. I-EFF ithe “sichitha ngokuphelele isinqumo sokumisa kabusha iKomidi leMeya futhi izodlulela ezihlalweni eziphikisayo ukuze iqhubeke nokubamba isigungu esiphezulu ukuthi siphendule.”
Osesithombeni esingenhla: UXolani Khumalo ufika eNkantolo yeMantshi yasePalm Ridge ekuseni ngosuku obekumele afungiswe ngalo njengelungu lekomiti lemeya aseKurhuleni.
Umthombo wesithombe: Sithunyelwe