Razeen Gutta
UGeronay Michaela Whitebooi ube ngowokuqala wesifazane kowe-judo ukuwinela elakuleli indondo yegolide kuma-Commonwealth Games ngemuva kokuhlula uShushila Likmabam wase-India kowamanqamu we-48kg.
UWhitebooi udle umhlanganiso emzuliswaneni wamaphuzu egolide ngemuva komdlalo othathe imizuzu engaphezudlwana kwemine, kanti indondo yakhe yegolide bekuyindondo yokuqala yelakuleli kwi-judo selokhu kwaba iMidlalo yase-Glasgow eminyakeni eyisishiyagalombili edlule.
Ukuwina kwakhe kube ngesinye sezikhathi ezinkulu eqenjeni lakuleli, ngezindondo ezimbili zesiliva kanye nezethusi ezintathu eziphuma kowe-judo, ukubhukuda kanye ne-gymnastics e-Birmingham namuhla.
Kwabaphambili kwezokubhukuda, bekulindelwe izindondo ezimbili zesiliva eqenjini lakuleli esigabeni sokugcina sosuku lapho uPieter Coetze kanye no-Erin Gallagher abenze kahle kakhulu.
UCoetze ubhukude kahle kowamanqamu wabesilisa we-50m backstroke ngesikhathi ethinta udonga ngesikhathi esingu-24.77 ngo-0.22 ngemuva kuka-Andrew Jeffcoat. Bekuyindondo yakhe yesibili ezinsukwini ezimbalwa ngemuva kokuthi awine indondo yegolide kowamanqamu we-100m breaststroke ngempelasonto.
UGallagher uqophe isikhathi sakhe esihle kakhulu ngesikhathi esingu-26.05 kowamanqamu wabesifazane we-butterfly ngesikhathi eqeda isibili ngemuva kuka-Emma McKeon wase-Australia.
UChristian Sadie wenze kahle emanzini kanti uwine indondo yethusi kowamanqamu wabesilisa we-50m freestyle S7. Lo mbhukudi okhubazekile ubevelele ikakhulukazi engxenyeni yokuqala yomncintiswano lapho aqede khona ngesikhathi esingu-29.78.
Kube uCaitlin Rooskrantz oqalile ukutholela elakuleli indondo namuhla emdlalweni wakhe wokuqala wama-Commonwealth Games, ngamaphuzu angu-13.433 amsizile ukuthi awine indondo yethusi kowamanqamu we-gymnastics.
Kube sekulandela uCharne Griesel ngemuva kukaWhitebooi otholele elakuleli enye indondo kowe-judo ehlula uMarie Celine Baba Matia wase-Cameroon owine indondo yethusi kowe-52kg wabesifazane.
Ekupheleni kosuku, uLara van Niekerk, uTatjana Schoenmaker kanye noKaylene Corbett bonke bangenele owamanqamu wabesifazane we-100m breaststroke ngesikhathi uChad le Clos ephuma kuqala ku-semi final abesilisa kowe-100m butterfly ukuze naye adlulele kowamanqamu.