Lubhalwe nguDylan Bettencourt
Umhleli wezemidlalo
Ngesikhathi uMax Verstappen enenkinga ye-gearbox ukuze ahlungele umjaho wangoMgqibelo, ukuwina e-Saudi Arabia bekubonakala kuyinto engenakwenzeka.
Bekuzwakala kuyinto engekho ukubikezela ukuthi uzokwazi ukuthola indondo ngesikhathi kuqala umjaho ngeSonto.
Kodwa-ke, umpetha womhlaba owawina amahlandla amabili ubonise ithalente lakhe ngesikhathi eletha imoto yakhe ye-Red Bull ekhaya futhi ephuma endaweni yesibili ebe esuka endaweni yesi-15.
Uzakwabo uSergio Perez udle umhlanganiso wawina umjaho okokuqala kanti uVerstappen ubesemuva kwakhe.
Abalandeli be-Formula 1 bebebambe umoya belindele ukuthi iqembu lishintshe uPerez noVerstappen kodwa lowo myalelo weqembu awufikanga.
Bekuwumjaho onzima kwi-Red Bulls njengoba bobabili abashayeli bekhale ngezinkinga eziningi ezimotweni ngesikhathi somjaho, kanti bekuyizinkinga ebezingase zikhombise ubuthaka kulabo mpetha.
Kungokwesibili kulandelana, oyedwa kwababili waba umpetha wanyakenye njengoba benweba ukuhola kwabo phezulu.
Imoto yezokuphepha yangaphambi kwesikhathi isize uVerstappen kakhulu njengoba ekwazile ukugoba isethi entsha yamathayi nokukhuphuka ezindaweni ezimbalwa ngesikhathi esisodwa.
Imoto yezokuphepha iqhamuke ngemuva kokuthi uLance Stroll we-Aston Martin eyalelwe ukuthi amise imoto yakhe ngenxa yenkinga yamabhuleki ayo angaphambili.
UFernando Alonso naye obeshayela i-Aston Martin weqe umugqa endaweni yesithathu kulokho obekungaba ukuthola indondo kwakhe okwekhulu.
Kodwa yena nethimba lakhe bathole inhlawulo yemizuzwana emihlanu kwi-pit lane ngokungalungile, okumenze wathola inhlawulo yemizuzwana eyishumi ngemuva komjaho.
UGeorge Russel obeshayela i-Mercedes uhlomule kwiphenalthi yangemuva komjaho weqa waya kweyesithathu ukuze athole indondo yakhe yokuqala yesizini.
ULewis Hamilton naye obeshayela i-Mercedes uqede endaweni yesihlanu.
UCarlos Sainz noCharles Leclerc be-Ferrari baqede ngemuva kwabo endaweni yesithupha neyesikhombisa.
Iphethini yokuhamba ngababili iqhubekile ngesikhathi u-Esteban Ocon noPierre Gasly be-Alpine beqeda endaweni yesishiyagalombili neyesishiyagalolunye.
Oqede endaweni yeshumi nobekuyindawo yokugcina kube uKevin Magnussen we-Haas.
I-Formula 1 izophinde ibe khona ngempelasonto yokugcina yenyanga nge-Australian Grand Prix.
Esithombeni esingenhla: USergio Perez
Umthombo wesithombe: Twitter