Linda Ximba
Umpetha omusha we-WBA Pan African junior featherweight osanda kuthweswa umqhele u-Innocent “Tycoon” Mantengu, uveze ukuthi uzosebenzisa le mali yomkomelo ukushada unkosikazi wesibili.
Uthe ubekhathazekile ngokuthi uzoyithathaphi imali eyengeziwe yokukhokhela amalobolo engoduso yakhe uNomzamo Mkhabela, ukuze abophe ngokusemthethweni ifindo likasofasilahlane.
“Ngiyethemba ukuthi ngizophothula yonke into ungakapheli unyaka,” kusho indoda eziqhenyayo ngesithembu.
UMantengu ushaye uLuthando Mbumbulwana ngamaphuzu emqhudelwaneni obuse-Sandton ngoLwesihlanu.
Lo mpetha oneminyaka engama-30 ubudala waseMtubatuba, enyakatho neKZN utshele i-Scrolla.Afrika ukuthi ubekade ehlela ukuqeda izingxoxo zamalobolo ekhaya lengoduso yakhe uNomzamo kusukela ngonyaka odlule.
Uthe umvalelo ubambezele izinhlelo zakhe kwazise imiqhudelwano obekufanele abambe iqhaza kuyo ibikhanselwa ngomzuzu wokugcina.
Washada nonkosikazi wakhe wokuqala, uNontobeko Zulu, emshadweni wesintu eminyakeni emibili edlule.
UMantengu onguthisha oqeqeshiwe, uthe isithembu akuyona into entsha kuye.
“Ngifunde ubuciko bokunakekela abesifazane abangaphezu koyedwa kubaba wami ongasekho owayenamakhosikazi amane. Ngibusisiwe ngokuthi amakhosikazi ami ayahloniphana. Bayasekelana futhi bakhulisa izingane zethu ndawonye,” kusho yena.
Ngaphambi kokuthola isicoco se-WBA, uMantengu ulahlekelwe yisicoco sakhe sikazwelonke ehlulwa u-Ayabonga “JayJay” Soncija e-East London ngowezi-2019, kodwa wabuya ngegiya eliphezulu ngempelasonto edlule ngesikhathi ehlula imbangi yakhe yase-East London.
Unqobe impi ngesinqumo samaphoyinti.