Sizwe Sibiya
URihanna, ongomunye wabaculi abathandwa kakhulu emhlabeni, ngoMsombuluko umemezele usuku nohlu lwabantu abazobonakala kwi-Savage X Fenty Show Vol.3 ezoba ngomhla zingama-24 kuMandulo.
I-Fenty iqanjwe ngegama langempela likaRihanna, uRobyn Rihanna Fenty.
Njengoba bonke abalandeli bakaRihanna abaziwa “ngeNavy”, bejabule ngezindaba ezinkulu ze-Savage X Fenty Show yesithathu, iNingizimu Afrika ibungaza umlingisi uThuso Mbedu, oqokwe njengomunye ozoba khona emidlalweni yalolu hlelo.
Okwenze abakuleli baziqhenye nakakhulu ukuthi igama lakhe belibhalwe kwividiyo ye-promotion egqamisa okuzokwenzeka embukisweni, futhi lingabekelwanga eceleni “kanye nabanye abaningi” abazobe bekhona.
Oneminyaka engama-30 udlala indima kaCora ochungechungeni oluhlonishwayo lwase-Hollywood, i-Underground Railroad, okuyindaba eyiqiniso esuselwa emlandweni wobugqila baseMelika. Usanda kufakwa ohlwini olude lwezindondo ne-TV Stare Breakout Star Award emiklomelweni yokuqala ye-Hollywood Critics’s Association ngomhlaka zingama-29 kuNcwaba.
Khonamanjalo, umcimbi kaRihanna oneminyaka engama-33 uzobe uhlanganisa imfashini, umdanso, umculo nobuciko bokwakha, ukugqamisa uhlobo olusha sha lwezitayela ze-Savage X Fenty.
Umcimbi uzobe usakazwa ku-Amazon Prime Video,
Umthombo wevidiyo: @rihanna