Menzi Magubane
Indaba ye-Royal AM ne-Premier League (i-PSL) igcine ifinyelele esiphethweni ngoLwesibili.
Lokhu kwenzeke ngemuva kokuthi i-Court of Arbitration for Sport (i-CAS) ichithe isicelo se-Royal AM sokuba ngabaphathi besicoco se-GladAfrica Championship.
Yize bekungeyona into ebilindelwe yiqembu laseThekwini, i-Royal AM ibingenayo enye indlela ngaphandle kokugwinya ukuzigqaja kwayo yamukele ukuhlulwa.
Lokhu kusho ukuthi i-CAS imemezele i-Sekhukhune United njengabanqobi abafanele besizini ka-2020/21.
Ngaphezu kokulahlekelwa yicala, umnikazi we-Royal AM, uShauwn Mkhize, uyalelwe ukuthi akhokhe imali elinganiselwa ku-R127,000 yezindleko zecala kuwi-Sekhukhune kanye ne-PSL.
“I-CAS ayinawo amandla okulalela isikhalazo esifakwe yi-Royal AM Football Club ngomhla ziyisikhombisa kuMandulo ngo-2021. Izindleko zokulamula, ezizonqunywa futhi zinikezwe amaqembu yiHhovisi Lenkantolo ye-CAS, zizothwalwa yi-Royal AM Football Club,” kusho isitatimende se-CAS.
“I-Royal AM Football Club izokhokhela i-National Soccer League kanye ne-Sekhukhune United FC umnikelo ka-R127,000 ukuze likhokhele izindleko zomthetho nezinye izindleko ezitholwe maqondana nenqubo yamanje yokulamula. Zonke ezinye izinhlangano zizozikhokhela izindleko zazo.”
I-Royal AM ibimelene nokukhushulwa kwe-Sekhukhune kwi-DStv Premiership ekupheleni kwesizini edlule. I-Royal AM ibone sengathi yenzelwe phansi yi-PSL njengoba ibihamba phambili emjahweni wokukhushulwa.
I-Sekhukhune isinikezwe isicoco seligi ngenxa yokunikwa amaphuzu amathathu emdlalweni wabo ne-Polokwane City.
Leli qembu lahlawuliselwa ukwephula imithetho yeligi ngokungafaki abadlali abanele abaneminyaka engaphansi kwengu-23 ngenxa yokubheduka kwe-Covid-19 eqenjini.
I-Royal AM ikhulume ne-CAS ngemuva kokuthi i-SA Football Association kanye neNkantolo eNkulu yaseGoli bengazange bazilalele izimfuno zabo.
Ngenxa yalokhu, uMkhize wayalela abadlali bakhe ukuthi bangalinge bangenele imidlalo yomkhumulajezi/yokukhushulwa ngeledlule nokwenze i-Chippa United yawunqoba yaphinde yathatha indawo yayo kwi-Premiership.
Kodwa-ke i-Royal AM ikwazile ukudlala kwi-premiership ngemuva kokuthi uMkhize aphumelele ukuthenga i-Bloemfontein Celtics ku-PSL.
Leli qembu laseThekwini selidlulile kulokho obekulindelekile kanti kungenzeka liqophe umlando ngokubamba iqhaza kwi-CAF Champions League ngokuphuma endaweni yesibili ku-Premiership.
Umthombo wesithombe: @SoccerLaduma