Usuku lokhetho lohulumeni basekhaya lubekwe phezu kweziphikiso ze-EFF ne-IFP

Lungani Zungu

UMengameli uCyril Ramaphosa umemezele ukuthi ukhetho lohulumeni basekhaya luzoba mhla zingama-27 kuMfumfu.

Lokhu kwenzeka yize kunesicelo se-EFF kaJulius Malema, kanye ne-IFP sokuthi luhlehliswe, bechaza ukwesaba igagasi lesithathu le-Covid-19.

I-DA iyakweseka ukuqhutshekwa nokhetho, kodwa yaxwayisa ngokuthi kumele kwenziwe izinyathelo zokuphepha.

Sekungokwesithupha ngaphansi kombuso wentando yeningi waseNingizimu Afrika ukuthi abavoti bezokhetha ubuholi kanye nabamele umphakathi emazingeni emikhandludolobha, emikhandlu kanye nasezifundeni.

URamaphosa wengeze wathi uNgqongqoshe Wezendabuko uDkt Nkosazana Dlamini-Zuma uzolandela inqubo yezomthetho edingekayo ukuze abhale lolu suku.

Unxuse abantu baseNingizimu Afrika, ikakhulukazi abavota okokuqala ngqa, ukuthi baqinisekise ukuthi babhalisele ukuvota.

NgoLwesithathu kube nokhetho lokuchibiyela oluyi-15 ezifundazweni eziyisikhombisa ukuvala izikhala ezishiywe ngamakhansela okungenzeka ukuthi ashonile, asula esikhundleni noma axoshwa emsebenzini.

Olunye ukhetho lokuchibiyela luzobanjelwa eMpumalanga yeKapa, e-Free State, e-Gauteng, eKZN, e-Limpopo naseMpumalanga mhla zi-19 kuNhlaba.

Umthombo wesithombe: @Julius_S_Malema