Lubhalwe nguDoreen Mokgolo
Izakhamizi zaKwa-Thema ezidinwe zigane unwabu zisola uSotswebhu we-ANC emkhandlwini wase-Ekurhuleni, uJongizizwa Dlabathi ngokuhlasela abebebhikisha ngokuthula.
Ilokishi lase-East Rand lahanjelwa ugesi kusukela ngomhlaka-11 kuNdasa ngesikhathi kusha isiteshi esikhulu saKwa-Thema.
Ezintatha zangoLwesithathu ekuseni amalungu e-MK Veterans Association (MKVA), kubikwa ukuthi bashaye baphinde basabisa izakhamuzi ebezibhikisha ngezibhamu.
Iqembu elibhikishayo belifuna izimpendulo ngokubambezeleka kokubuyiswa kwe-transformer eyonakele eyathathwa ngonyaka odlule iyolungiswa kanye nokunqanyulwa kukagesi okweqile.
Umholi weqembu uTshepo Mwelase ubengomunye wababhikishi abaningi abahlaselwa isixuku se-MKVA. Usola ukuthi isixuku saqhumisa izibhamu ngesikhathi simshaya ngenhloso yokumesabisa.
Ababhikishi bathi uDlabathi we-ANC ubengomunye wabahlaseli be-MKVA, kodwa yena uyaphika.
UDlabathi ubize lezi zinsolo njengembudane nemizamo ecacile yokudicilela phansi isithunzi sakhe.
“Ngifikile kule ndawo ngiyohlola ukuthi ngabe bekunemashi yini njengoba bekubikwe ukuthi ikhona.
“Ukuba khona kwami kuphinde kwanikeza uTshepo Mwelase indlela ephephile yokuphunyuka ezandleni zamalungu e-MKVA.”
Kodwa uNobhala we-PAC esifundeni uVumani Makhanya uthe: “Sicela uDlabathi aziphendulele emkhandlwini futhi kumele aphendule ngesenzo sakhe kulesi siphithiphithi.”
NgoLwesihlanu olwedlule ikhansela lakuWadi-74, uThulani Simelane litshele i-Scrolla.Africa ukuthi izingxenye ezisele zelokishi zixhunywe kabusha, kodwa kube nezinkinga zobuchwepheshe.
Ngenxa yomthamo ogcwele kakhulu kanye namakhebuli anenkinga ugesi ubulokhu uphazamiseka e-Van Eck Substation.
“Sikwazile nokuthola amakhebuli anenkinga sawalungisa. Ochwepheshe bazoqhubeka bahlole kanti kuzothi uma sekuphele konke ugesi uzobuya.”
USimelane wengeze ngokuthi i-transformer eyodwa yaKwa-Thema eyayinenkinga futhi yathathwa ukuyolungiswa izoze ibuyiswe ngoNcwaba.
Isithombe esingenhla: Isixakaxaka phakathi kwezakhamizi zaKwa-Thema
Umthombo wesithombe: UDoreen Mokgolo