Lubhalwe nguDoreen Mokgolo
USolwazi uBengu usize ekuguquleni uhlelo lwezemfundo eNingizimu Afrika njengongqongqoshe wokuqala wezemfundo ngemuva kuka-1994.
Wasungula isikole samabanga aphezulu futhi kamuva waba yinxusa laseNingizimu Afrika e-Germany.
IPhini likaMengameli uMnuz Paul Mashatile uncome isilomo sikaSolwazi uSibusiso Bengu ongasekho ngeqhaza lakhe ekuguquleni imfundo yaseNingizimu Afrika ngemuva kobandlululo.
“KuSolwazi Bengu silahlekelwe uthisha oqavile, usopolitiki noyisisebenzi sabantu,” kusho uMashatile emngcwabeni kaBengu eNyuvesi yaseZululand ngoLwesihlanu.
UBengu ushone elele ekhaya ngomhla zingamashumi amathathu kuZibandlela. Wayeneminyaka engu-90 ubudala.
UMengameli uCyril Ramaphosa umhloniphe ngoMngcwabo Okhethekile Osemthethweni wesigaba sesibili. UBengu wayengungqongqoshe wokuqala wezemfundo eNingizimu Afrika ngemuva kwentando yeningi futhi kamuva wabe esesebenza njengenxusa e-Germany kusukela ngo-1999 kuya ku-2003.
Usungule isikole samabanga aphezulu iDlangezwa ngo-1969 wasebenza njengothishanhloko kwaze kwaba ngu-1976.
UMashatile ubalule ukuthi uBengu ubambe iqhaza elibalulekile ekubhaleni imithetho ebalulekile njengoMthetho Wezikole waseNingizimu Afrika nasekubhekaneni nezinselelo emkhakheni wezemfundo ephakeme.
“Ubhekelele ukuhlanganiswa kweminyango eyishumi nesikhombisa eyayihlukene wabe eseyihlanganisa wabe esethula iCurriculum 2005 ukuze kuguqulwe uhlelo lokufunda ezikoleni. Uthando lwakhe lokukhuthaza ukulingana lube nomthelela omkhulu emphakathini,” kusho uMashatile.
Owayengungqongqoshe wezempilo uZweli Mkhize owafundiswa nguBengu umchaze njengofana nobaba esikhungweni iDlangezwa.
“Njengezwe sidinga ukuzinikela kothisha abathanda abantu babo ngentshisekelo yokuguqula umphakathi,” kusho uMkhize.
UMkhize uphinde wadalula ukuthi i-ANC yathumela uBengu umkhankaso oyimfihlo noMangosuthu Buthelezi ukuthi bayosungula i-IFP ukuze ibe yisisekelo se-ANC.
“Okubuhlungu ukuthi kuningi okungahambanga kahle ngesikhathi kuqhubeka lolu hlelo nokwaholela ekutheni kube nokungezwani kubaholi be-IFP ngenxa yamaqhinga namasu eqembu, ngenxa yalokhu i-ANC yamcebisa ukuthi aye ekudingisweni,” usho kanje.
Esithombeni esingenhla: Umngcwabo kaSolwazi uSibusiso Bengu.
Umthombo: Sithunyelwe