Kamogelo Olaitan
Sekuphele amasonto amabili isibhedlela sesithathu ngobukhulu emhlabeni, iChris Hani Baragwanath kanye nezinye izibhedlela eGoli zishoda ngezinkwa ezihlinzekwa iziguli.
UMnyango wezeMpilo esifundazweni uqinisekise lokhu ngemuva kokuthi i-DA izwakalise ukukhathazeka ngokushoda kokudla e-Bara.
UNgqongqoshe wezeMpilo oyilungu le-DA uJack Bloom uthe isibhedlela siphelelwe ukudla ngenxa yokungaphathwa kahle kwezinkontileka nokungakhokhelwa kwabahlinzeka ngempahla.
Isimo besimuncu kangangokuthi odokotela bathinte inhlangano engenzi nzuzo, i-Random Acts of Kindness, enikele ngezinkwa ezingu-100, ubisi kanye nojamu esibhedlela.
Kodwa uMnyango uyakuphika ukuthi kube nokushoda kokudla wathi banezinselelo mayelana nesinkwa kuphela.
UMnyango ubhale ekhasini lawo laku-Twitter ngoLwesine uqinisekisa imindeni yeziguli ezisesibhedlela ukuthi isimo sesixazululiwe.
Okhulumela uMnyango uKwara Kekana uthe zonke ezinye izinhlobo zokudla bezihlinzekwa e-Bara.
Odokotela abakhulume nabezindaba abacele ukungadalulwa bathe, kudingeke ukuthi bahlangane nemindeni yeziguli kanye nabahlengikazi ukuthi bakhiphe imali emaphaketheni abo ukuze bathenge isinkwa seziguli.
“Kunenani elanele lokudla. Kubonakala sengathi inkinga enkulu isinkwa njengamanje,” kusho udokotela.
.
