Lubhalwe ngu-Everson Luhanga
Zibalelwa ku-5 000 izaguga kanye nabantu ababuthaka ezweni lonke abazobhekana noKhisimusi omubi ngemuva kokuthi amasela entshontshe izipho ezibiza imali engaphezu kuka-R1 million.
Ekuseni ngeSonto iqembu lezigelekeqe lingene emahhovisi e-Solidarity Helping Hand, e-Kempton Park lantshontsha inqwaba yezipho ebezikhona.
Okhulumela i-Solidarity Helping Hand, uMnu Phillip Bruwer uthe ezinye zezipho kukhona ama-shampoo anephunga elimnandi anikelwa izinkampani ezikhiqiza imithi njengezipho zikaKhisimusi.
Uthe amasela antshontshe emabhokisini ezipho obekuhloswe ngazo ukwenza uKhisimusi wezaguga ube mnandi.
“Izigebengu zintshontshe yonke into ebalulekile ezingayiqukula ngezandla kusukela emnikelweni wethu namakhompuyutha kuya kumarediyo kanye nemiklomelo yosuku lwethu oluzayo lwegalofu ngomhlaka-17 kuLwezi.
Kuphinde kwantshontshwa ijeneretha enkulu, amathuluzi kanye nomshini wokugunda utshani,” kwengeza uBruwer.
UMariolette Vorster ongumgqugquzeli wenhlangano esiza umphakathi wase-Ekurhuleni, uthe usonhlalakahle uCharmanay de Klerk uye ehhovisi lesifunda ngoMgqibelo ntambama wabona ukuthi injini kagesi yesango iphazamisekile.
Ngokushesha uDe Klerk wabiza inkampani yonogada yendawo, kodwa ngalesi sikhathi asikho isipho ebesithathiwe.
Kodwa ngeSonto inkampani iqinisekise ukuthi kugqekezwe ngezikhathi zasekuseni.
“Sithe sifika ngeSonto ekuseni sabona ukuthi kukhona okungahambi kahle.
UVorster uthe bavule icala esiteshini samaphoyisa e-Kempton Park. Akekho osaboshiwe mayelana nalokhu kugqekeza.
UVorster nethimba lakhe manje basebenza kanzima ukwenza ezinye izipho ezizojabulisa abantu abadala kanye nemiklomelo yosuku lwegalofu.
“Siphatheke kabi, kodwa ngeke siyivumele into efana nalena isithene amandla,” kusho yena.
UVorster ucela noma ngubani ongaba nolwazi ngesigameko noma owazi ukuthi izipho ezintshontshiwe zikuphi axhumane naye ku-078 523 2705.
Isithombe esingenhla siveza izipho eziningi zikaKhisimusi zezalukazi ezintshontshiwe
Umthombo: unikeziwe