Sizwe Sibiya
Ngonyaka wezi-2019 ubehola amabhokobhoko emhlabeni wonke. Ukaputeni uSiya Kolisi manje usehola isizwe ezikhathini zenjabulo njengoba ebedansela ingoma kaZakes Bantwini engakaphumi ebizwa nge-Osama ayicula noKusango.
Ividiyo ayifake ku-Instagram ikhombisa uSiya oneminyaka engama-30 ongukaputeni wamabhokobhoko, ubonakala esejimini eshova ibhayisikile elalele nomculo kaZakes Bantwini.
Ividiyo esivele yasabalala ifakwe uBantwini, obesevele eyakhele udumo le ngoma ehlanyise abaningi emasontweni amabili adlule ngemuva kokuba ayidlale emcimbini wakhe obizwa ngeKunye.
Ividiyo eveza uZakes ngesikhathi ephefoma kukhona izithameli ngemuva edlala umculo we-deep house, ivele yahlanyisa abantu ezinkundleni zokuxhumana.
UZakes Bantwini igama lakhe langempela uZakhele Madida oqhamuka KwaMashu eThekwini. Igama likaKasango langempela uKasmario Thulani Ike Fankis uqhamuka e-Welom esifundazweni sase-Free state. Lokhu kuhlangana kwabo bazibiza ngeHouse music saviours njengoba sekuvele kwaduma ama-piano ezweni lethu.
Ingoma ebizwa nge-Osama ilindeleke ukuba iphume ngoLwesihlanu mhla ziyi-10 kuMandulo.