Usinde ekufeni umelusi wezinkomo ephoswa edamini

Lubhalwe nguDoreen Mokgolo

Usizwe ikhono lakhe lokubhukuda umelusi wezinkomo uThabang Chabeli ngesikhathi amasela ezinkomo emubopha ase amphonsa edamini elise-Ekurhuleni i-Spaarwater Dam ngoLwesibili.

Umelusi wezinkomo oneminyaka engu-32 odabuka e-Lesotho uthe uhlaselwe abasolwa abathathu behlomile ngesikhathi ezinakele izinkomo ezingu-40 emadlelweni.

“Bangishayile, bangibopha izandla nezinyawo ngezintambo zezicathulo, base bengiphonsa edamini.”

“Bengisaba ukuthi ngizominza kodwa ngivele ngathandaza ukuze ngizokwazi ukwehlisa umoya ngakwazi ukuqhamuka necebo lokuthi ngiphume kuleli damu ngisaphila,” etshela i-Scrolla.Africa.

“Bengizitshela ukuthi ngizoshona. Idamu ligcwele. Ukube ngitatazelile bengizominza.”

UChabeli uchazile ukuthi ukwazile ukuziqaqa izintambo zezicathulo abeboshwe ngazo wase wabhukuda waya ekugcineni kwedamu ukuze aphephe.

UChabeli wazifundela ukubhukuda esakhula nabangani bakhe.

Uthi ubenalo ulwazi lokuthi ngelinye ilanga ikhono lakhe lokubhukuda lizomsiza, kodwa kulokhu lisindise impilo yakhe.

Uphumile edamini, wagijima waya emizini eseduze wabika lobu bugebengu abahlali base bephuma inqina bethungatha abasolwa.

“Batholakale nemfuyo eyebiwe futhi beshayiwe. Basizwe ukufika kwamaphoyisa. 

Abasolwa abaneminyaka engu-30 kanye nengu-35 kulindeleke ukuthi bavele eNkantolo yeMantshi e-Nigel lingakapheli leli sonto.

Okhulumela amaphoyisa aseDuduza uSgt Harry Manaka ukuqinisekisile ukuthi benza uphenyo ngecala lokweba imfuyo, ukuthumba, kanye nokushaya ngenhloso yokulimaza. 

Esithombeni esingenhla: Izinkomo eziluswa uChabeli

Umthombo wesithombe: @Doreen Mokgolo

Scrolla World Cup Quiz