Mbuso Nwayila
USimon Shabangu usebandakanyeke ezingozini ezine zezimoto.
Kulezi zigameko owesilisa eneminyaka engama-44 ubudala wase-Tzaneen e-Limpopo uahlekelwe imilenze yakhe yomibili.
Kodwa uShabangu akazange avumele amabhadi akhe asemgwaqeni ukuthi amphazamise. Usaphila impilo yakhe ngokugcwele.
NgoMgqibelo uShabangu uhambe ngebhayisikili ibanga elingamakhilomitha angama-38 emvuleni nabagibeli bamabhayisikili abaphila kahle emzimbeni ukuqoqa imali yokusiza umphakathi.
Ubengomunye wabantu abanikele ngezihlalo ezinamasondo kubafundi base-Letaba Special School ngempelasonto.
Utshele i-Scrollla.Africa ukuthi kufanele agibele ibhayisikili ukuze abonise abantu abakhubazekile ukuthi bangenza noma yini abazimisele ngayo.
Ingozi yokuqala kaShabangu yenzeka ngowe-1993 eneminyaka eyi-16 ubudala futhi leyo ngozi yaphula umgogodla wakhe.
Ngaleso sikhathi wayesenayo yomibili imilenze, kodwa omunye kwadingeka ukuthi unqunywe ngenxa yokungenwa ukubhebhetheka kwesifo.
Wabandakanyeka kwenye ingozi ngowe-1996 wathola imihuzukwana ngemuva kokuthi ashayiswe umshayeli owayephuzile.
Ngowezi-2000 washayiswa imoto eyaqhamuka ngemuva kwakhe ishayelwa ohola impesheni owayedakiwe, kwathi ngowezi-2003 odokotela baphoqeleka ukuthi banqume umlenze wesibili ngenxa yezifo.
Ngowezi-2008 wathola imihuzukwana kwenye ingozi e-Vosloorus eGoli.
Ukholelwa ukuthi ngalokho ahlangabezana nakho uNkulunkulu ubemqeqeshela ukuthi abe yizwi labantu abakhubazekile.
Ngenxa yalokho wasungula inhlangano ebizwa ngokuthi i-Ability Beyond Disability, elwela amalungelo abantu abaphila nokukhubazeka.
NgoLwesihlanu, mhla zintathu kuZibandlela, uzobe emele abantu abakhubazekile ephalamende laseMpumalanga emcimbini wokugubha Usuku Lwamazwe Ngamazwe Lwabantu Abaphila Nokukhubazeka.