Everson Luhanga
Umndeni kaMthokozisi Ntumba uzwakalise ukuphoxeka ngemuva kokuthi amaphoyisa amane athwese icala lokumbulala atholwe engenacala ngoLwesibili.
La maphoyisa aboshwa nyakenye embhikishweni onodlame i-Fees Must Fall ngesikhathi abafundi base-Wits bebhikishela ukungabhalisi ngenxa yezikweletu.
UNtumba (35), wayevakashele udokotela wakhe ukuze ayohlolwa. Ngesikhathi ephuma kwadokotela, wabambeka esiphithiphithini wadutshulwa washonela endaweni yesigameko.
UNtumba obeshadile engubaba wezingane ezine, ubesanda kuphothula iziqu zakhe ze-masters futhi wayesebenza eMnyangweni wezokuHlaliswa kwaBantu.
UDokotela uTebogo Sedibe, ongudokotela owazama ukumsiza ngesikhathi edutshulwa, nowaphinde wethula ubufakazi ecaleni, utshele i-Scrolla.Africa ukuthi uNtumba ubenembobo yenhlamvu kwisingenhla somzimba wakhe.
Womane amaphoyisa atholwe engenacala lokumbulala kanti wonke amacala abekwe wona ahoxisiwe.
Amaphoyisa uTshephisho Kekana (27), uCidraas Motseothatha (43), uMadimetja Legodi (37) kanye noVictor Mohammed (51), bebebhekene namacala okubulala newokuzama ukubulala.
NgoLwesibili, iNkantolo eNkulu yaseGoli, eGoli, iwasule wonke amacala abebekwe la madoda, iJaji uMawabo Malangeni utshele inkantolo ukuthi abukho ubufakazi obutholakalayo obubamatanisa nokudutshulwa kukaNtumba.
Ividiyo yokubulawa kukaNtumba ihanjiswe enkantolo njengobufakazi, kodwa abashushisi abakwazanga ukufakazela ukuthi abasolwa abakule vidiyo ngamadoda abekwe icala.
Umndeni kaNtumba uthe awumangali ngalesi sinqumo ngoba ukholwa ukuthi kwasekuqaleni kwaleli cala amaphoyisa abevikelwe ozakwabo.
Umfowabo u-Ayanda Ntumba uthe kube yisikhathi esinzima kakhulu selokhu kwashona uNtumba. “Icala lidonse isikhathi eside. Ukuqulwa kwecala enkantolo bekunzima, kuzwela, futhi kuqeda amandla.
“Bekufanele siye njalo enkantolo bese sitshelwa ukuthi icala lihlehliselwe olunye usuku.
“Kwesinye isikhathi bekubiza kakhulu ukuthi siye enkantolo. Asizange sizihambele zonke izigcawu ngenxa yalokho,” esho.
Ngesikhathi kukhishwa isinqumo, amalungu omndeni kaNtumba obulewe ebengekho enkantolo.
Okhulumela i-National Prosecuting Authority eGoli, uPhindi Mjonondwane uthe ngeke aqinisekise ukuthi bazosiphikisa yini lesi sinqumo.