Lubhalwe nguBuziwe Nocuze
Umfundi kaGrade 10 waseLenteguer High School, eKapa ufihle ukuthi uyahlukumezeka esikoleni kwaze kwaba yilapho ebuya ekhaya evuvukele ubuso nemilenze.
“Ekuqaleni indodana yami ibingafuni ukusitshela ukuthi kwenzekeni ngempela. Ibifuna ukufihla ukuthi ibihlukumezeka esikoleni,” kusho unina etshela i-Scrolla.Africa.
NgoLwesithathu iqulu labafundi bakulesi sikole kusolwa ukuthi lishaye indodana yakhe ngoba ingenayo imali.
“Sibone ukuthi imali iyanyamalala ekhaya, saxakeka ukuthi imali ithathwe ngubani futhi kungani,” usho kanje. Sithole ukuthi indodana yethu ibithatha imali ikhokhele iziqhwaga ukuze zizoyeka ukumhlukumeza esikoleni.”
Umzali uye esikoleni eyobikela uThishomkhulu.
“Bengilindele ukuthi isikole sibize izingane ezihlukumeza ingane yami nabazali bazo ukuze lokhu kuxazululwe,” usho kanje.
“Ngishaqekile ngesikhathi othisha bengitshela ukuthi ngeke bangivumele ngihlangane nabafundi ngoba bangase bangihlasele.
Umama uthe othisha bayalesaba leli qembu elihlukumeza ezinye izingane.
“Izingane ezimnyama ziyahlukunyezwa esikoleni. Indodana yami ingitshele ukuthi ayifuni ukubuyela emuva futhi umngane wayo wayeka isikole. Kubukeka sengathi othisha bayazivikela kuleli qembu, kodwa sizothini ngokuphepha kwezingane zethu?” ebuza.
U-Unathi Booi woMnyango wezeMfundo eWestern Cape uthe umfundi uphume esikoleni engakhiphanga sitatimende wabuya ngakusasa nabazali bakhe.
“Imininingwane yesigameko iqoqiwe kanti uphenyo lusaqhubeka. Kuthathwe izinyathelo ezisheshayo, abanye abenzi bobubi bahlonziwe. Isikole sizolandela imigudu yaso yokuqondiswa kwezigwegwe,” kusho uBooi.
Isithombe esingenhla: ULenteguer High School.
Umthombo: Lenteguer High School/Facebook