Sizwe Sibiya
Njengoba izinkampani zokuqopha i-Afrotainment kanye ne-West-Ink zisakhona kusanethemba lomculo we-gqom kuleli.
Umculi we-kwaito waseThekwini uDJ Tira ugcine ekhiphe ividiyo yengoma ye-gqom esihloko sithi “Sikilidi” ngoLwesithathu ngaphansi kwenkampani aqopha kuyo i-Afrotainment.
Le ngoma edidiyelwe uGeneral C’ isiphenduke ingoma edume kakhulu edlalwa kwezokucima ukoma, emisakazweni nasemarenki aseThekwini selokhu ekhishiwe ngenyanga edlule. Iculwa uDladla Mshunqisi, uSizwe Mdlalose, uMs Mamellow kanye noMiss Vee osafufusa.
Ngaphambi kokukhipha le ngoma uTira ubematasa ejikeleza noThemba Broly, owaziwa ngokuba ngowokuqala ukungena kwisizini yesithathu ye-Big Brother Mzansi.
UBroly ophinde abe umdwebi wama-tattoo ubekhiphe i-albhamu enezingoma eziyisikhombisa esihloko esithi-New Dawn ngaphansi kwe-Afrotainment mhla zizinye kuNtulikazi, yalandelwa i-albhamu enezingoma ezintathu esihloko esithi-Ghost ayikhiphe nomfowabo uTira.
UTira obuye aziwe ngelikaMalume ngokunikeza abaculi abasebancane ithuba, ukhiphe ividiyo yomculo edidiyelwe uSlowMan ukugubha iminyaka yokuzalwa engu-46.
“Sikufisela usuku oluhle lokuzalwa @DJTira malume,” kubhala uBroly ekhasini lakhe laku-Twitter efaka uTira.
Umthombo wesithombe: Instagram
Umthombo wevidiyo: YouTube