Lubhalwe nguLinda Ximba
Abantu bakuleli bathandazela ukuthi uBonang Matheba athole umsebenzi wokungena esikhundleni sikaSteve Harvey njengomethuli wohlelo lukaMiss Universe.
Kunezinguquko ezinkulu eziqhubekayo ohlelweni luka-Miss Universe, okuhlanganisa nokushiya komethuli walo.
Ekuqaleni kwale nyanga lo somahlaya odumile ushiye lo mcimbi ngemuva kweminyaka emihlanu ilandelana ewumethuli wawo.
Kusukela lapho ebelokhu ekhula amahlebezi okuthi uMatheba ongumethuli wezinhlelo zikumabonakude owawina izindondo, owayengumsakazi kwi-Metro FM nophinde abe umlingisikazi angase afakwe ohlwini lokuvala isikhala sikaSteve.
Umsingathi ka-Miss Universe uJakapong “Anne” Jakrajutatip ucele abalandeli ukuthi baphakamise abethuli abasha kanti uMatheba uhamba phambili ohlwini.
Ngokwe-blog ye-Binge Pop amagama alandelayo elikaMatheba, uJeannie Mai-Jenkins, uZuri Hall kanye no-Ashley Graham aphume phezulu ohlwini lwabangase bathathe indawo kaHarvey.
Ku-Twitter uMatheba odabuka e-Mahikeng e-North West uhamba phambili ngenxa yabalandeli bakhe.
Umncintiswano ka-71 ka-Miss Universe uzoba se-New Orleans Moral Convention Center e-New Orleans, e-Louisiana ngomhlaka-14 kuMasingana ngonyaka ozayo.
Esithombeni esingenhla: UBonang Matheba
Umthombo wesithombe: Sithunyelwe