Lubhalwe nguDoreen Mokgolo
Intombazane yaseDuduza e-Ekurhuleni ithi iyaxhashazwa ngenxa yezibazi ezisebusweni nasekhanda ngemuva kokuhlaselwa inja kamakhelwane yohlobo lwe-pitbull.
Umgilwa (16) ubehamba esuka epaki lendawo ngomhlaka-23 kuZibandlela ngesikhathi inja imhlasela.
Inja yaluma izingxenye zobuso bayo, isandla, nezingxenye zesikhumba sayo, yashiya izibazi ezibonakalayo ezithikameza ukukhula kwezinwele zayo.
Ama-Pitbull ayizinja ezilwayo ezizalaniswa e-UK kusukela ekuzalweni kwe-bulldog kanye ne-terrier ukuze zizingele. Njengoba zangeniswa kuleli ngeminyaka yango-1970s, zakhuliswa njengezinja ezigadayo kanye nezinja eziqhathwayo ngokungekho emthethweni.
Osemusha utshele i-Scrolla.Africa ukuthi ngosuku lokuhlasela, wabona iqulu lezingane zigijima zicela usizo ngesikhathi inja izijaha.
“Ngaqala ukubalekela endaweni ephephile kodwa ngashibilika ngawa. Inja yaqala ukungiluma futhi yadephuna izingxenye zesikhumba sami ngesikhathi ngicela usizo. Umnikazi wenja uye weza egijima, ephethe ibhodlela likabhiya. Wazama ukuxoxisana nenja ngokulala phansi, kodwa kwanhlanga zimuka nomoya.
“Omunye umhlali ukwazile ukudonsa inja ngomlomo kwathi omunye wayiphoqa ukuba ayifake ibhodlela likabhiya emlonyeni ukuze ithule, kodwa ngaleso sikhathi bese ngivele ngilimele kabi,” kusho lo osemncane.
Le ntombazane ithe ontanga bayo bayayigcona ngenxa yezibazi zayo abajwayele ukuzimatanisa nezabantu abasuke bedakiwe ezindaweni zokucima ukoma.
“Ngiyasaba ukuhamba emigwaqweni ngoba kungenzeka inja iphinde yeqe, futhi ngihlushwa i-migraine engapheli okwenza kube nzima ukugxilisa ingqondo ekilasini,” kucaza yena.
Umama wengane, u-Aida Makwakwa ufuna kwenziwe ubulungiswa ngokwehlela indodakazi yakhe.
“Kungizwisa ubuhlungu ukuthi lezi zinja zisekhona emphakathini, akekho oseke wathweswa icala ngokuhlasela kwazo. Umnikazi wenja uhlulekile, wathi akazange athumele inja ukuthi ilume indodakazi yami,” kusho uMakwakwa.
Umnikazi wenja, uBongani Mthimkhulu uthe inja yaphuma ngesango lonogada ngesikhathi elivula ukuze angene ngemoto.
“Iqeqebana lezingane belidlala ngeziqhumane futhi izinja bezithukile. Ngokushesha ngesikhathi ngivula isango inja yavele yaphuma igijima.
“Ngizamile ukuyijaha kodwa ibisivele iqalile ukuhlasela umgilwa ngesikhathi ngiyibamba. Sikwazile ukuyehlisa umoya,” usho kanje.
Kwenye indatshana emayelana nama-pitbull kusizindalwazi sawo, inkampani yezomthetho i-DSC Attorneys ithi uma umuntu ehlaselwa futhi elinyazwa i-pitbull, unelungelo lokufuna isinxephezelo kumnikazi.
Isinxephezelo ngokuvamile sihlanganisa izindleko zokwelashwa ezitholwe umgilwa, ukulahlekelwa imali kanye nomonakalo ovamile wobuhlungu nokuhlupheka.
USolwazi uSusan Swart waseNyuvesi yase-Stellenbosch uthi ukuqeqeshwa kwama-pitbull kuvame ukwenziwa kabi noma kubandakanye ukuhlasela ngamabomu “njengoba evame ukusetshenziswa njengesandiso samandla sendoda enolaka, njengezimpawu zesimo ngamazinyo”.
Esithombeni esingenhla: Amanye amanxeba kamgilwa.
Umthombo wesithombe: Doreen Mokgolo