Elmon Tshikhudo
Sekuphele izinyanga ezintathu indodana kaTshinanne Siobo eneminyaka engu-10 ishonile ngemuva kokuthi owayeyisoka lakhe athele umuzi wabo ngophethiloli wawushisa.
Umama wezingane ezimbili (37) wase-Murunwa endaweni yase-Nzhelele e-Limpopo uthe ubelele nezingane zakhe ngesikhathi isoka lakhe lizama ukubulala umndeni. Lokhu kuhlasela kuza ngemuva kweminyaka eminingi yokuhlukunyezwa okwahlukene.
Njengoba bekulindelwe, uSiobo nezingane zakhe bakwazile ukubalekela ilangabi elivuthayo kodwa balimale kanzima.
Baphuthunyiswe esibhedlela lapho indodana yakhe (10) eshonele khona ngenxa yokulimala kakhulu.
Ngemuva kokuphuma esibhedlela, uSiobo uye wacabanga ukuthi uzokwaziswa ngosuku lwenkantolo njengoba ebecabanga ukuthi umhlaseli wakhe usejele.
Kodwa akunjalo. Umhlaseli usazulazula ngokukhululeka emigwaqeni.
“Lesi yisikhathi lapho abanye abantu baseNingizimu Afrika abagubha khona inyanga yeNkululeko, kodwa kimina yisikhathi sosizi nobuhlungu benhliziyo. Angisoze ngalithola ithuba lokubungaza inqobo nje uma umhlaseli wami esangumuntu okhululekile. Ngingabungaza kanjani uma indodana yami ibulawe umlilo oqothulayo obangelwe ngumuntu ebengimthanda?” ebuza.
Uthe usizi lwakhe lwaqala ngo-2020 ngesikhathi lo mlisa eqala ukumhlukumeza.
“Waqala ukungishaya uma ngikhononda ngezinto ayezintshontsha emzini wami ukuze aziyise emzini wakhe. Ngangingazi ukuthi indoda ingaze yebe ushukela. Uma ngikhononda wayengishaya engisabisa ngokuthi uzongibulala uma ngibiza amaphoyisa.”
USobo ulahlekelwe yizo zonke izinto zakhe emlilweni. Ngemuva kokuhlaselwa, umakhelwane kaSiobo uye wamnikeza indawo yokuhlala yesikhashana nezingane zakhe ezisele.
Uthe ukubulawa kwendodana yakhe kumenze wazizwa engenalutho.
“Ngibona sengathi kuthathwe ingxenye ethile kimina, angiphephile njengoba le ndoda ingaphandle, ngicela nibophe lombulali ukusiza mina nendodakazi yami,” kusho uSiobo.
Okhulumela amaphoyisa ase-Limpopo, uColonel Mamphaswa Seabe, uthe umsolwa usagcwele amathafa kanti uyafunwa ukuze aboshwe.