Umculi we-soprano odabuka e-Limpopo uMasabane Cecilia Rangwanasha uhlomule ngomklomelo wengoma ngoLwesine ebusuku emncintiswaneni ohlonishwayo we-BBC Cardiff Singer of the World e-UK.
Ubengomunye wabahlanu abafinyelele kowamanqamu, behlaba amajaji umxhwele ngomculo uStrauss, uSchumann kanye nomqambi wezingoma wakuleli uLe Roux Marais.
URangwanasha oneminyaka engama-27 ubemele isifundazwe sase-Limpopo ecula ezingeni likazwelonke kusuka ngonyaka wezi-2009 kuya kowezi-2012, wase enza i-PGDip eNyuvesi yaseKapa, ne-BTech ku-Vocal Art e-Tshwane University of Technology. Ubengumculi osemncane ku-Cape Town Opera iminyaka emibili, futhi usezuze imiklomelo eminingi eNingizimu Afrika.
Ngemuva kokuwina umklomelo wengoma ngoLwesine, uzobe ecula kowamanqamu ngoMgqibelo.
Isithombe: Facebook